SKLABITUT SUPSIDIA DEN KOMUNIDAT BONERIANO

Kralendijk,- Den Kuadro di diskulpa i pordon pa e krímen kometé kontra hende for di Afrika, Hulanda a pone 200 mion euro pa proyekto pa konsientisá desendientenan di katibu tokante kontinuashon di sklabitut den entre otro komunidat Boneriano.

Henter e asuntu di e kapital aki a bira un modelo di gana plaka brutu pa esnan mas sabí pero no pa desendientenan ku fam ku nan a haña despues di 1863.

Lamentablemente nan ta keda katibu bou di e régimen di supsidio. For di siglo diesshete te 1863 a trata nos antepasado komo, animal, opheto, propiedat di un otro, a bati, violá, menospresiá nan,pone nan traha fòrsá  bou di menasa di e blanku, ku a mal usá e hende muhé, ku hende pretu ta inferior na hende blanku, ku rasismo i diskriminashon te awe ta kontinuashon di e sistema di katibu ku ta parti di kolonialismo ku bo ta eksperensiá diariamente.

E parti mas importante ta pa desendientenan di katibu na Bonaire yega na dekolonisashon di nan mente. Pa Grupo di Diálogo Bonaire no tin mester di ningun ayudo òf sosten di ningun Komishon di konmemorashon sentral ni di otro grupo di e otro islanan.

Sklabitut na Bonaire tin su mes historia , pues no bini ku storianan general manera trouma. Kada isla selebrá konmemorá na boso manera. Bonaire tin ku atendé ku su profeshonalnan ku ta traha i biba na Bonaire.  Trouma na Bonaire no por kai bou di trouma ku tin riba otro isla.

Papia, duna informashon, konta storia, tene charla sin hasi terapia pa liberá desendientenan di trouma ta plaka bentá afó. Bonaire no mester di ningun kantor ku trahadó di otro isla i boneriano pa dòrna bukèt i gasta e sèn. Laga Finansa di Entidat Públiko ku su trahadónan atendé ku e 11 mion. Hinka e sèn den restrukturashon di enseñansa i un HBO, pone atenshon riba salubridat, kuido, bibienda, saneá lèntfel, duna Fundashon Tienda Pa konsumidó boneriano un status pa kontrolá kiko tin den produktonan ku nos ta kome.

Skirbi buki , traha kánòn por pero no ku kapital di e 11 mion pero ku supsidio di OCW, di Hulanda despues ku direktivanan di skol a fihá nan meta kon restrukturá enseñansa. Si tin opheshon kontra mi ponensia i ke sigui riba e ruta kolonial, diskriminatorio i lukrativo pa grupito e konklushon ta, kontinuashon di kolonisashon di mente pa medio di supsidio. Si pidi abo koperashon pa skirbi buki, kánòn, konta storia i mas di e kosnan bunita ei. Kobra, pasobra ta ganashi brutu riba bo lomba tin.

FUENTE: ARTHUR SEALY