ABVO BONEIRU KIER ENFATISÁ E MOTIBU KLA DIKON ABVO BONEIRU A DESAFILIÁ FOR DI USIBO.

Kralendijk, – Relashoná ku e ponensia ku ainda e sindikato ABVO Boneiru no ta afiliá na USIBO, e direktiva di ABVO Boneiru kier enfatisá e motibu kla di kon ABVO Boneiru a desafiliá for di USIBO.

USIBO a keda fundá dia 19 aprel 2016, basá riba e prinsipionan kardinal di solidarismo, kompañerismo i rèspèt mutuo.

Sindikato ABVO tabata un di e ko-fundornan, den representashon di konsehero Nacho Ignacio i Chali Anthony, ku na e tempu ei tabata presidente di ABVO Boneiru. Huntu ku defuntu Nico Rollan i demas kompañeronan di otro sindikatonan, manera AFWB, SIMABO i FEDEBON a funda USIBO, pa komo partner sosial, representando  gremio sindikal, partisipá na e plataforma di “Dialogo Sentral Tripartit di Boneiru”.

E idea pa formá un Union di Sindikatonan na Boneiru a keda konkretisá na sede di ABVO Boneiru. USIBO ta un UNION di sindikatonan i no un federashon, pero a usa e statutonan di CGTC di Kòrsou komo modelo pa lanta e union di sindikatonan.

ABVO Boneiru no por a sigui mas den e unidat di sindikatonan, pasobra e filosofia i manera di atendé a kambia despues ku lidernan manera defuntu Nico Rollan i otronan ku tabata mantené e mesun liña di prinsipionan básiko i balornan sindikal klave, no ta presente mas.

ABVO Boneiru ta keda kere firmemente den un UNION di sindikatonan basa riba solidarismo, kompañerismo i rèspèt mutuo i ta habri pa diálogo pa sigui defendé e interesnan di miembresía, e klase trahadó i di komunidat en general.

FUENTE: ABVO Bonaire/LIVE99FM