LÍDERNAN DI DERECHONAN HUMAN NA BONEIRU TA KONDENA E VOTO DI DAISY COFFIE KONTRA PROGRAMA EDUKATIVO PA MUCHANAN

Kralendijk,- Bonaire Human Rights , Muhernan Fuerte di Pueblo Progresivo Uni, i defensor di derechonan humano James Finies ta kondena fuertemente  e voto I rechazo di Daisy Coffie, lider di M21, kontra un moshon pa yuda duna guia di tarea di kas o “huiswerk” gratuitamente den idioma materno di e mucha, despues di oranan di skol pa esnan menos preveligia i ku no por paga pa esaki.

Derechonan humano di edukashon di e mucha no ta negoshabel. Eskusanan burokratiko i polítiko no por stop akshon pa yuda e mucha den nesesidat segun James Finies, aktivista I orado na Nashonan Uni tokante derechonan humano.

Sra. Coffie a pretende den konseho insular i riba media sosial ku motibu di su voto tabata kosnan logístiko, falta di analisis di skolnan i rekisitonan di akohida pa mucha.

Esakinan tur ta eskuusnan swak I delibera i ta reflektá un falta di konsiderashon total pa e derechonan di pueblo Boneriano. Sra Coffie su akshon I reakshon ta demostrá e mes un aktitut i arogansia kual e, huntu ku e mesun Cyril Vrolijk i tambe Clark Abraham, miembronan di e klan polítiko di asina yama élite, a vota PRO, VOOR, na 2017 pa ankra Boneiru den Konstitushon Hulandés.

Daisy Coffie a traishoná e pueblo Boneriano e tempu ey meskos e ta traishona esnan menos previlegia, e pueblo awor atrobe. E voto VOOR pa ankra e pueblo e tempu ey a pone e base pa tur sufrimentu ku awe nos muchanan, hubentud i pueblo Boneiriano ta pasando aden aktualmente, inkluyendo e krisis den edukashon.

Ta evidente awor ku Daisy Coffie ta sirbi prinsipalmente interes di e grupo élitario, sin tene kuenta ku e nesesidadnan di famianan ordinario ku nan yunan ta luchando pa logra edukashon di kalidat di akuerdo ku nan derechonan humano. Sra Coffie su akshonnan ta indiká un patrónchi di preferensia pa e grupo privilegiá riba e mayoría di e komunidat Boneiriano.

BHRO ke pone enfasis ku tur mucha nan derecho na edukashon ta garantisá bou di ley internashonal, inkluyendo e Charter di e Nashonan Uni i e Tratado riba Derechonan di Mucha. Falta struktural den skolnan i kuido di mucha ta hasi programanan manera esaki aún mas urgente.

Reakshonando na e krisis, BHRO huntu ku firmantenan di un petishon dor di mayornan preokupa, a presentá un keho formal na prinsipio di yuni na Minister Hulandés di Edukashon i na e Konseho di Derechonan Humanos na Ginebra, pidiendo intervenshon urgente pa garantisa ku e derechonan edukashonal humano di e mucha Boneiriano ta respetá i ta kumpli ku nan.

E keho a haña atenshon internashonal i a kousa ku e Konseho di Derechonan Humano lo kuestiona e gobierno Hulandés. E Ministerio di Edukashon Hulandés a reakshona riba BHRO su keho I a plania reunion historiko ku BHRO pa diskuti e krisis.

Blokia inisiativanan ku ta yuda nos muchanan siñja ta kontra e obligashonnan ku gobierno tin bou di e Charter di Nashonan Uni pa respeta derechonan humano, segun e deklarashon konhunto di BHRO.

Nos ta hasi un apelashon na tur representantenan di gobierno pa:

Pone interes di e mucha prome – Traha huntu ku skolnan, mayornan i organizashonnan komunidad –  I Asegurá ku niun mucha no keda atras pa motibu di eskusnan polítiko

Muchanan di Boneiru meresé akshon — no eskuus.

Bonaire Human Rights Organization (BHRO)

Muhernan Fuerte Ala femenino di Pueblo Progresivo Uni

James Finies – defensor di Derechonan Humano

FUENTE: BONAIRE HUMAN RIGHTS ORGANIZATION