JAMES FINIES TA REUNI KU GEZAGHEBBER DI BONEIRU DESPUES DI MISHON INTERNASHONAL HISTORIKO  

Kralendijk,- Despues di mas ku 1.165 dia di trabou di defensa di derechonan di pueblo Boneriano na nivel internashonal defensa sostené riba tereno internashonal, James Finies resientemente a reuní ku Gezaghebber di Boneiru, John Soliano, markando un momento importante den e trayekto internashonal realisa pa presentá e kaso di Boneiru dilanti di Nashonnan Uni i komunidat internashonal ront mundo.

Huntu ku Presidente di BHRO, Davika Bissessar-Shaw, Sr. Finies a hiba e kaso di Boneiru hopi mas leu ku e isla, hibando e kaso i bos di pueblo Boneriano den komunidat internashonal I den e sistema di Nashonnan Uni, den Latino-Amérika, Sentro-Amérika, Karibe i mas alew.

Durante e trayekto internashonal aki, nan a dialogá ku Presidentenan, Promé Ministernan, lidernan di gobièrnu, diplomátikonan, organisashonnan regional I internashonal i representantenan di Estadonan Miembro di Nashonnan Uni, buskando atenshon internashonal pa e kaso di Boneiru i su derecho di autodeterminashon.

E kampaña tambe a logra sosten regional importante, ku ta urgiendo pa tuma akshon ku Asamblea General di Nashonnan Uni i ku Estadonan Miembro di Nashonnan Uni, ku mira riba e reinskripshon di Boneiru riba lista di Nashonnan Uni di Teritorionan Sin Propio Gobernashon.

E esfuerso internashonal a yega na e punto I plataforma di mas haltu di mundo na Juni 2026, ora ku formalmente a presentá un proyekto di resolushon tokante Boneiru den e proseso di di 80 seshon di Asamblea General di Nashonnan Uni. E inisiativa ta atendé e status di Boneiru i e obligashonnan di Reino Hulandes bou di Artíkulo 73 di Karta di Nashonnan Uni.

Durante e reunion Finies a presentá dokumentashon na Gezaghebber Soliano relashoná ku e trayekto internashonal aki di e trabou pa defendé derechonan di pueblo Boneriano.

Finies a skohe awor pa trese kas bek e eksperensia atkerí i e relashonnan internashonal konstruí durante e trayekto aki  i pa sigui ku su trabou den arena polítiko di Boneiru. E eksperensia, konosementu i ret internashonal ey ta forma awor parti di forsa di su partido polítiko, i lo usa esakinan pa defendé dignidat, derechonan i interesnan di pueblo i pa yuda konstruí un futuro mas hustu.

E trabou di derechonan humano i defensa internashonal di BHRO ta sigui bou di liderazgo di su Presidenta, Davika Bissessar-Shaw.

FUENTE: JAMES FINIES