ABVO I FEDEBON TA EKSPRESÁ PREOKUPASHON SERIO TOKANTE E OUMENTU DI TARIFA KU WEB

Kralendijk, – ABVO i FEDEBON ta ekspresá preokupashon serio tokante e oumentu di tarifa ku WEB resientemente a anunsiá i implementá. E subida di tarifanan ta afektá famia, trahadó i negoshinan na Boneiru, den un situashon kaminda kosto di bida i di servisio básiko ya ta un peso grandi pa hopi hende.

Ámbos Sindikato ta enfatisá ku mester tin transparensia den kalkulashon i desishon pa ku oumentu di tarifa, ku ta fundamental pa mantené konfiansa di pueblo. Pa e motibu ei, ABVO i FEDEBON konhuntamente a manda un karta pa Kolegio Ehekutivo ku algun pregunta di urgensia.

Punto Prinsipal di Preokupashon ta:

Kalkulashon di supsidio.

WEB ta risibí supsidio pa yuda mantené e kosto pa usuarionan mas rasonabel i realístiko, tumando na konsiderashon ku kosto di bida na Boneiru ta sumamente haltu. Nos ta pidi klaridat kon e supsidio ta wòrdu kalkulá, kon e ta wòrdu apliká i kon e ta wòrdu distribuí entre e poblashon.

Produkshon di turbinanan di bientu. Tin falta di informashon tokante e kantidat di energia ku e turbinanan di bientu a produsí den e último seis lunanan i kon e produkshon aki ta kontribuí na e bahamentu di e tarifanan.

Ròl di ACM. Nos ta pidi informashon si ACM (Autoriteit Consument & Markt) tabatin un ròl di asesoramentu òf  kontrol den e proseso di oumentu di tarifanan.

ABVO i FEDEBON ta pidi un investigashon independiente pa duna mas transparensia tokante kalkulashon i aplikashon di e supsidio. Nos ta konsiderá esaki nesesario pa garantisá ku pueblo tin bista kla kon tarifanan ta wòrdu determiná i kon fondo públiko ta wòrdu utilisá pa mantené tarifanan rasonabel.

Nos ta supliká Kolegio Ehekutivo pa duna klaridat mas pronto posibel. E falta di informashon tokante e oumentu i kalkulashon di tarifa ta afektá direktamente bienestar di pueblo.

E dos sindikato ta bisa ku lo sigui mónitòr e situashon i ta spera un reakshon pronto di Kolegio Ehekutivo.

Presidente ABVO Boneiru: Tafila Janga

Presidente FEDEBON: Gerald Bernabela