MCB BONAIRE TA PIDI KOPERASHON DI KOMUNIDAT PA MANTENÉ ATM-NAN DEN BON ESTADO

Kralendijk,- MCB Bonaire tin ATM na diferente lokalidat rònt Boneiru i ta hasi tur esfuerso pa garantisá ku nan tin sufisiente sèn kèsh disponibel. Sin embargo, por sosodé ku, debí na un demanda haltu, e sèn kèsh den un ATM ta baha òf kaba promé ku por yena e mashin atrobe. Den tal kaso, e ATM no por entregá e suma ku e kliente a pidi.

Tur ATM ta risibí mantenshon preventivo kada kuartal, pa asina por sigui brinda e servisio ku klientenan ta kustumbrá di dje. MCB Bonaire ta hasi un yamada na komunidat pa yuda kuida e ATM-nan. No usa karchi kibrá, doblá òf dañá den e mashin, pasobra esaki por dañá partinan interno i pone e ATM temporalmente pafó di servisio. Klientenan por pidi un karchi Bankomatiko òf credit card na un branch di MCB Bonaire, òf tuma kontakto ku Contact Center na number 715-5520. Nos ta enkurashá nos klientenan i komunidat en general pa hasi pago ku karchi Bankomatiko òf pa hasi uso di Online Banking. Esakinan ta método di pago fásil, lihé i sigur, ku por redusí e nesesidat di usa sèn kèsh.

Depósito via ATM

Un opshon ku nos ATM nan ta brinda tambe ta esun di depósito. Sin embargo nos ta konstatá ku depósito di sèn kèsh no ta wordu hasi di forma korekto. Por ehèmpel, tin biaha ta pone sèn kèsh den e ATM sin envelòp, òf ta depositá moneda òf biyete doblá den e envelòp. E tipo di uso akí por blokia òf daña e mashin, ku komo konsekuensia ta pone e ATM pafó di servisio. Pa evitá esaki, MCB Bonaire ta pidi klientenan pa sigui instrukshonnan indiká riba e ATM i prepará tur depósito korektamente.

Den futuro serkano, MCB Bonaire den fase lo kuminsá remplasá e ATMnan. Na e momento akí, e tim ta trahando riba e diferente opshonan tékniko nesesario pa e proyekto. Asina MCB Bonaire ta sigui traha riba ekselensia.

FUENTE: MCB BONAIRE/LIVE99FM