PREGUNTA PUBLIKO DI JAMES FINIES NA GEZAGHEBBER DI BONEIRU, JOHN SOLIANO: BO RESPONSABILIDAT TA KU DEN HAAG ÒF KU E DERECHONAN HUMANO DI E PUEBLO DI BONEIRU? 

Kralendijk,- James Finies, fundador di Bonaire Human Rights Organization i lider di Partido Pueblo Progresivo, a manda un karta di obheshon na Gezaghebber di Boneiru, Sr. John Soliano, ekspresando su preokupashon tokante e propuesta di lei Hulandes ku lo duna e gezaghebbernan di Boneiru, Sint Eustatius i Saba e outoridat pa ordená ku kontenido online wòrdu kita si nan ta konsiderá ku e por menasá e órden públiko. Finies ta argumentá ku dunando un solo funshonario nombrá—ku no a wòrdu skohe demokrátikamente—e tipo di poder aki, sin aprobashon previo di un hues ni intervenshon di hustisia, ta semejante ku e outoridat di un atministradó kolonial òf gobernante outoritario, en bes di e tipo di gobernansa ku por spera den un demokrasia basá riba e estado di derecho.

E karta di obheshon di Finies na Gezaghebber Soliano ta sigui su karta anterior di 28 di yüni 2026, dirigí na e Promé Minister di Hulanda, e Minister di Hustisia i Seguridat, Miembronan di Parlamento Hulandes i e Konseho di Derechonan Humano, den kua el a ekspresá su preokupashon serio tokante e ekspanshon di leinan penal Hulandes ku ta kriminalisá glorifikashon di terorismo i ekspreshon públiko na Boneiru.

Saba, ku un poblashon di mas o ménos 2.000 hende, Sint Eustatius ku mas o ménos 3.000, i Boneiru, ku tabatin aproximadamente 10.000 habitante na 2004 i awor mas ku 25.000, semper a keda komunidatnan Karibense pasífiko i hospitalario, sin aktividat terorista di importansia ku por hustifiká restrikshonnan asina amplio. E Raportadó Spesial di Nashonnan Uní riba Kontra-Terorismo i Derechonan Humano a advertí repetidamente ku leinan kontra-terorismo ku ta hopi amplio por reprimí diferensia di opinion, limitá partisipashon siviko, kriminalisá ekspreshon polítiko legítimo, i nunka mester wòrdu usa pa hustifiká mas kontrol estatal riba debate públiko òf pa debilitá libertatnan fundamental.

Finies ta enfatisá ku e asunto ta bai muchu mas aya di sosial media. E pueblo di Boneiru a mira kon nan eskoho demokrátiko i desishon kolektivo a wòrdu silensiá, nan derechonan humano a wòrdu negá, i nan isla a wòrdu poni bou di gobernashon eksterno den un status konstitushonal ku nan no a skohe libremente. Te ainda awe, e pueblo di Boneiru ta wòrdu goberná for di Den Haag sin un bos efektivo ni representashon den e desishonnan ku ta forma nan leinan, institushonnan, derechonan i futuro.

Mientras Bonerianonan tin ku soporta e marginalisashon kontinuo aki, Finies ta puntra dikon leinan Hulandes impone for di Den Haag ta keda tratá I ta prevalese pa outoridatnan públiko di Boneiru, miéntras ku derechonan humano internashonal i obligashonnan di tratadonan ku Reino Hulandes tin obligashon pa kumpli ku nan no ta ni konsiderá ni respetá.

Pregunta publiko na Gezaghebber Soliano:

“Ken bo ta sirbi? Bo ta prinsipalmente defendé i kumpli ku leinan establese pa polítikonan Hulandes miles di kilómetro lew for di Boneiru, òf bo ta defendé mesun fuerte e derechonan demokrátiko i derechonan humano di e pueblo di Boneiru bou di e Karta di Nashonnan Uní, e derecho internashonal i tratadonan internashonal di derechonan humano?”

Finies ta indiká ku asta na Hulanda mes, e lei aki a krea preokupashon konstitushonal. E Komishon Temporal di e Tweede Kamer riba derechonan fundamental i revishon konstitushonal a atvertí ku e lei aki ta afektá libertat di ekspreshon i e derecho pa manifestá, i p’esei ta rekerí protekshonnan legal mas fuerte.

Finies ta enfatisa ku Artíkulonan 19 i 25 di e International Covenant on Civil and Political Rights (ICCPR), huntu ku Artíkulonan 19 i 21 di e Universal Declaration of Human Rights (UDHR), ta protehá libertat di ekspreshon i e derecho pa partisipá den asuntunan públiko. Kualke restrikshon mester ta legal, nesesario, proporshonal i konforme ku e normanan internashonal di derechonan humano.

Respet pa e estado di derecho ta eksigí mas ku simplemente implementa leinan impone pa polítikonan Hulandes na Den Haag. E ta eksigí mesun respet pa e boluntat demokrátiko di e pueblo Boneiriano, nan derecho pa partisipá den gobernashon, i e obligashonnan superior ku ta resultá for di derecho internashonal i tratadonan di derechonan humano ku Reino Hulandes ta obliga na sigui .

FUENTE: JAMES FINIES