Redakshon
Kralendijk,- E Reunion Plenario di e Konferensia Permanente di Partidonan Polítiko di Latino Amérika i Karibe (COPPPAL) unanimamente a eligi James Finies komo e Presidente nobo di e Komité di Dekolonisashon di COPPPAL.
COPPPAL ta reuní 80 partido polítiko di 30 pais i tin su sede na Siudat di Mexico, e kapital di Mexico.
Komo rekonosementu di e lucha internashonal i mundial di Finies tokante Boneiru i otro teritorionan Karibense atministrá pa Reino Hulandes, e di 43 Reunion Plenario di COPPPAL a nombra James Finies pa presidi e Komité di Dekolonisashon.
E mandato di e Komite ta pa promove dialogo y atenshon internashonal riba temanan di dekolonisashon relashona ku Aruba, Korsou, Sint Maarten, Bonaire, Sint Eustatius, y Saba, komo tambe asuntonan ku ta regarda Puerto Rico y e islanan Malvinas
Durante su seshon plenario resientemente na e edifisio anterior di e Senado di Mexico, COPPPAL a reafirmá su posishon fundamental kontra kolonialismo den tur su formanan.
E organisashon ta enkurashá diskushon kontinuo di e asuntunan aki denter di Nashonnan Uni i otro foronan internashonal i a ekspresá su sosten pa e kompromiso internashonal kontinuo pa loke ta trata Boneiru i otro teritorionan sin propio gobernashon.
COPPPAL tambe a reitera su solidaridad ku Puerto Rico y a reafirma e posishon di Argentina pa loke ta e Islanan Malvinas.
Komo parti di e programa plenario, James Finies a dirigí su mes na delegadonan di Latino Amérika, Karibe, Afrika, Oropa i Asia riba asuntunan di dekolonisashon kontemporáneo.
Den su presentashon, el a enfatisa preokupashonnan pa loke ta trata protekshon di identidat kultural di Boneiru, implementashon di normanan hurídiko I legal internashonal, i e importansia pa garantisá ku asuntunan relashoná ku e isla ta sigui risibí atenshon internashonal apropiá pa medio di mekanismonan multilateral establesé.
James Finies tambe a hala atenshon spesial na e marginalisashon kresiente di pueblo di Boneiru pa medio di leinan i manehonan dirigí institushonalmente ku a resultá den kambionan demográfiko signifikante durante último añanan.
Finies a señjalá preokupashon ku e proporshon di e isla su nativonan i poblashon lokal Boneriano establesé pa hopi tempu a baha sistematikamente konstantemente te komo un porsentahe minoritario di e poblashon total, loke ta lanta preguntanan importante tokante e eliminashon kontinuo di herensia kultural, identidat, idioma i partisipashon signifikante di Boneiru den asuntunan públiko.
James Finies a enfatisá ku e desaroyonan aki ta hustifika diálogo i konsiderashon kontinuo den kuadro di normanan internashonal aplikabel i e proseso di dekolonisashon di Nashonnan Uni.
FUENTE: JAMES FINIES
GIPHY App Key not set. Please check settings