Redakshon
Willemstad,- Komo preparashon di un temporada di kalor ku ta espesialmente den luna di ougùstùs i sèptèmber, Servisio Meteorológiko Kòrsou a prepará un perspektiva di temperatura pa Kòrsou.
Manera ta konosí, último añanan ta registrando temperaturanan di aire ku ta superá e promedio ku nos a konosé den e último 30 añanan. No solamente e promedio ta mas haltu, pero tambe e temperatura máksimo di dia ta ser superá i su durashon ta birando mas largu. E temperatura haltu a bira di tal índole ku Servisio Meteorológiko a saka na diferente momentu boletin spesial pa kalor ekstremo.
Faktornan ku ta influensiá e régimen di temperatura ta e temperatura di Laman Karibe. E fluho di aire ta pasa riba laman i esaki ta keinta i despues subi tera. Tambe durante di dia solo ta keinta tur e superfisie di Kòrsou i e fluho di aire ta keinta mas ainda. Kentamentu di superfisie ta wòrdu influensiá dor di kantidat di nubia i tambe áwaseru ku ta kai. Den e kuadro aki ta pronostiká ku lo tin un “super El Niño” den Osean Pasífiko, i su influensia lo redusí den nos region e kantidat di áwaseru durante di temporada di áwaseru. Pues ku un redukshon di nubia i áwaseru, temperaturanan lo ta mas haltu den e lunanan ku ta bini.
Konforme datonan klimatológiko di Meteo, durante di luna di mei normalmente e temperatura promedio ta 28.5°C, ku respektivamente un temperatura máksimo i mínimo di 36.1°C i 22.4°C.
Pa e lunanan ku ta sigui Meteo Kòrsou ta pronostiká un oumento di temperatura promedio te ku òktober. Pa e próksimo lunanan, yüni te ku òktober, ta pronostiká temperaturanan mas haltu ku promedio, ku enfoke riba sèptèmber, indikando temperatura promedio entre di 29.1 i 30.7°C i un máksimo di alrededor 32.9 pa 34.5°C.
Ta antisipá ku e kondishonnan di temperatura máksimo lo ta komparábel ku 2024, e aña mas resien di kayente-ekstremo den e rèkòrt di Kòrsou.
Meteo ta rekomendá pueblo di Kòrsou e siguiente Medidanan di Prekoushon durante temporada di kalor:
- Keda den fresku
- Bebe mas awa
- Evitá hasi kos físikamente pisá durante oranan mas kalor
- Bo ta sinti malu? Bai sinta den fresku, bebe awa i freska kurpa ku awa
- Pone atenshon na esnan vulnerabe
- Sòru pa sombra, awa limpi i fresku pa animalnan.
Servisio Meteorológiko Kòrsou lo sigui monitoria e situation di e tempoarda di kalor benidero.
Sigui tur mensahe ofisial di Servisio Meteorológiko pa bo ta debidamente informá.
Meteo ta siguí vigilá e situashon di tempu 24/7.
FUENTE: SERVISIO METEOROLÓGIKO KÒRSOU/LIVE99FM
GIPHY App Key not set. Please check settings