TAYER: “FAMIA – SU IMPORTANSIA DEN BIDA DI MUCHA –“ UN ENFÓKE HOLÍSTIKO PA APOYÁ MUCHA DEN SU FAMIA PA MÁS ÉKSITO ESKOLAR 19 I 21 DI MEI – 2026

Kralendijk,- Akademia Apoyo pa Ekselensia den Karera Eskolar (di Fundashon Apoyo Edukativo Boneiru) ta invitá profesionalnan edukativo na Boneiru pa un tayer intensivo tokante e tema “Struktura i Relashonnan den Famia: importansia pa karera eskolar di mucha –”. E tayer ta trata entre otro e diferente forma di famia i e fortalesa i reto di kada forma. Tambe lo trata e diferente funshonnan di famia, kon esaki ta impaktá e mucha den diferente etapa di edat, i kon komunidat por yuda òf al kontrario, stroba e famia pa kumpli ku su funshonnan. Otro punto ta e prehuisio (imahen negativo) ku ta biba den nos komunidat pa ku sierto forma di famia i kon esaki ta influenshá e imahen propio di e mucha negativamente. Túr tipo di famia tin su retonan i túr tipo di famia ta potensialmente kapas pa ofresé mucha un edukashon ekselente. Tambe lo trata e impakto di historia kolonial i sklabitut riba famia.

Durante e tayer lo kontestá tres pregunta sentral:

• Pregunta 1:  Kiko ta ‘famia’ i kon famia por impakta desaroyo di mucha i su karera eskolar.

Lo repasá tipo i funshonnan di “famia”, i diferente reto ku famia ta enfrentá den e mundo di awendia.  Ademas, ta trata e manera kon nos historia di sklabitut i kolonisashon a i ta sigui afektá struktura i relashonnan di famia den nos komunidat, mientras ku nos ta mantené un bista klá riba futuro pa transformá e influensia aki. .

• Pregunta 2:  Kuá tipo di famia ta komún na Boneiru i kon e diferente tipo di famia ta impakta mucha na nos isla?

Den e segmento aki di e tayer lo krea un panorama lokal tokante ‘famia’ na Boneiru i na ki forma (tur tipo di) ‘famia’ na Boneiru por fungi komo un rekurso balioso i apoyo grandi pa mucha/hoben den nan karera eskolar.

• Pregunta 3: Kon por sostené famia i mucha pa mas éksito eskolar ?

E tayer ta trata formanan kon un edukadó por apoyá e mucha den e relashon ku su famia i tambe e famia mes pa nan por fungi komo un rekurso fuerte pa e mucha. Nos Fundashon a desaroyá un modelo integrá di sosten (e Modelo Wayaká) ku ta enfoká riba 6 area di desaroyo, 5 método di apoyo, i hasiendo distinshon den 5 etapa di edat. Ademas, e tayer ta alineá ku e temanan Pobresa y Violensia/abuso den bida di mucha ku ya a trata kaba den otro tayernan.

E tayer ta dirigí  riba: mèntor, teamleiders i zorg-coordinators den enseñansa sekundario, maestro di enseñansa primario, remedial teachers i demas profeshonal ku ta traha ku mucha i hoben den deporte, arte i rekreashon. Ta enkurashá direktiva i kabesnan di skol, trahadó di Departamento Komunidat i Kuido i FORMA pa partisipá.

E tayer ta:

• enserá 2 seshon ku ta riba djamars 19 di mei i djaweps 21  di mei 2026. Mester sigui ambos seshon
• orario: 6:00 – 8:30 pm
• tuma lugá na Avanti, Antriol.
• Den idioma Papiamentu.
• Kosto: 40 $ (ku ta kubri 2 seshon di tayer (total 5 ora di tayer), material di estudio i sertifikado

Fasilitadónan ta: Paola Pourier i Lydia Emerencia

Pa mas informashon i inskripshon, interesado por tuma kontakto ku nos organisashon pa medio di mailadres: seob.bestuur@gmail.com. Duna nòmber i kandidat di persona ku ta registrá i si ta relevante, kuá organisashon nan ta representá.

Famia tin impakto grandi rib’e mucha. Huntu ku famia nos por hasi diferensia signifikativo den bida di mucha na Boneiru.

Direktiva di Fundashon Apoyo Edukativo Boneiru. Akademia Apoyo pa Ekselensia den Karera Eskolar

Patronisadornan: MCB Bank, Orco bank, Curoil, i WEB NV Boneiru

FUENTE: FUNDASHON APOYO EDUKATIVO BONEIRU/LIVE99FM