DJAWEPS 10 DI APREL 2025 TABATIN UN “BAN TOPA” ORGANISÁ PA MEDIO DI RABIN BALDEWSING KORDINADÓ NASHONAL KONTRA DISKRIMINASHON I RASISMO HUNTU KU UNKOBON.

Kralendijk,- E intenshon tabat pa deliberá tokante siguridat di bida, pobresa i kosto di bida haltu. Señor Rabin Baldewsing a pidi pa presentenan bini ku tres proposishon pa e por presentá na gobièrnu hulandes.

E anochi a kohe un rumbo polítiko kaminda a tilda Hulanda di, kontra tur regla asta di Nashonnan Uní, ta nenga di yuda Bonaire kombatí pobresa, pero ni un palabra di krítika riba Bonaire su gobernashon. Mi a puntra kiko nos presente den nos zona konfortabel, ta hasi na Bonaire pa yuda alsa kalidat di bida di siudadanonan pero no a haña reakshon. 

Ami ta di enseñansa i ta konvensé ku enseñansa ta un di e faktornan   importante pa ataká pobresa. Mi a i ta sigui  boga pa un HBO na Bonaire. Diputado den Heyer a bisa mi ku ta trahando riba un Onderwijsvisie. Mi ta sigur ku nunka a puntra pueblo kiko e ta pensa i ken ta e personanan ku mester ta den un komishon asina.

Esaki tambe ta défisit demokrátiko. Mi ta di opinion ku mester mehorá enseñansa basá riba inisiativa di gruponan pafó di gobièrnu. Konkretamente mi ta bai aserká mas persona i gruponan independiente manera; Unkobon, Sindikato, Piskabon, Kriabon, i direktivanan di skol pa kompilá un plan di enseñansa ku ta inkluí un sentro di edukashon agríkola ku ta duna enseñansa riba e tópikonan ; krio di bestial, vegetashon, medio ambiente i kuminda.

Un plan ku mester yega aserka Señor Rabin Baldewsing. Awor ta ora pa duna kontenido na e lema Traha Huntu. i legumai e burokrasia di Kolegio Ehekutivo. Tokante pobresa mi ta rekomendá e buki Armoede uitgelegd aan mensen met geld di Tim’s Jongers.

Tokante burokrasia di gobièrnu di Bonaire lesa e buki; Komt een land bij de dokter di Michelle van Tongerloo. Mi konklushon despues di djaweps ta ku nos hendenan ku sèn ku ta mendigá serka Hualnda ta mes òf mas pober ku esnan ku ta kai bou di e drèmpel di pobresa. 

FUENTE: ARTHUR SEALY/LIVE99FM