TRABOU MESTER PAGA

Kralendijk,- Pa hopi aña sindikalismo a enfoká riba kondishonnan laboral primario ku ta enserá entre otro salario, dianan di fakashon i kompensashon di fakansi, bonus di Pasku, oumento periódiko a base di bon prestashon, gratifikashon di kumplimentu di aña di servisio, overtaim, ets.

Den un palabra tur loke tabatin di haber ku pago den sèn pa e labor prestá. E lema tabata i te ainda ta trabou mester paga. Nos por bisa ku e aspekto aki di trabou a bin keda reglá den nos Kódigo Sivil i diferente leinan laboral, di kual Lei laboral 2000 ta un ku ta konta pa Boneiru. Legalmente e ministerio di asuntunan laboral ta enkargá ku supervishon i mantenshon di e leinan aki. Ta opvio ku sindikalismo su ròl den esaki ta di vigilante.

Banda di esei, na mesa di negosashon, sindikalismo pa fata di leinan riba e tereno di sirkumstansianan laboral, a duna atenshon tambe na sirkumstanisanan bou di kua e trahadó mester ehersé su labor. Den esaki e lema lu sindikalismo a usa ta tur trahadó mester por traha den un ambiente sigur i salú. A yega e ora pa ban regla esaki den un lei. Mucho ta e situashonnan laboral na Boneiru, kaminda tantu e siguridat komo e salú di e trahadó ta bou di menasa serio.

Nos tur i trahadónan sigur sa di situashonnan sumamente peligroso den entre otro e sektor di konstrukshon, kaminda trahadónan ta konstantemente bou di peliger pa te hasta di nan bida. Mirando e desaroyo ekonómiko di Boneiru mas i mas nos trahadónan ta eksponé na peligernan pa nan salú. Esaki ta e kaso kaminda trahadónan mester traha ku produktonan kímiko, biomédiko, pero tambe ku asbèst i otro produktonan ku por ta dañino pa nan salú. E kaso di lèntfel a habri nos wowo skèrpi skèrpi.

Pa regla esaki, sindikalismo i sigur USIBO lo mester boga pa entrodukshon di e lei ku ta regla sirkumstansianan laboral. Na Ulanda esaki ta e

                                                      Arbeidsomstandigheidswet, ARBO. E lei aki ta obligá dunadónan di trabou pa perkurá ku e trabounan ku nan trahadónan mester ehersé diariamente no ta trese e seguridat i e salú di nan na peliger. Dunadónan di trabou mester hiba un maneho ku ta dirigí riba sirkumstansianan laboral mas mihó i optimal posibel. Unabes ku e lei ta na vigor e departamentu di inspekshon laboral lo ta esun enkargá ku supervishon i mantenshon di kumplimentu di e lei aki. Mantenshon i supervishon ku kumplimento di tur e leinan laboral ta eksigí un par di kos sumamente importante. Nan ta

1. Informashon i formashon di liderato sindikal i shòpstewardnan riba e tereno di konosementu di nos leinan laboral i e abilidat pa señalá violashon di esakinan. Informashon general na e trahadó i e dunadó di trabou ta nesesario.
2. Un relashon bon entre sindikalismo i e ministerio di asuntunan laboral.
3. Afiliashon di trahadónan di e diferente sektornan na sindikato, kaminda sin miedu di intimidashon òf menasa nan por denunsiá violashonnan di nos leinan laboral i risibí protekshon di nan sindikato ku por enfrentá tur dunadó di trabou ku no ta kumpli ku nan debernan.

E leinan laboral ku ta regla e relashon di trabou i ku ta regla tantu e debernan komo derechonan di e trahadó den e akuerdo laboral ku e ta sera, pero tambe e desaroyo ku banda di kondishonnan laboral primario sindikalismo tin bista i ta duna atenshon na sirkumstansianan laboral ku ta garantisá tantu seguridat komo salú di e klase trahadó ta logronan ku ta e fundeshi pa selebrá konsientemente Dia di Labor riba 1 di mei.

Dia di Labor pues no ta djis un dia di fiesta, pero mas ku tur kos e ta un dia pa reflehá riba e logronan danki na luchanan fuerte i ku sakrifisionan personal i perseveransha di lidernan sindikal ku vishon i amor pa e klase trahadó.

E ta un dia tambe pa e klase trahadó realisá i ta konsiente ku e ta e union di e trahadó, e afiliashon masal di trahadónan den sindikato a duna e forsa pa e bos di e trahadó a haña e rekonosimentu i rèspèt ku awe nos ta gosa di dje.

Pues Dia di Labor tin un nifikashon profundo di solidarismo pa logra i sigui ta konsiente pa defendé e logronan aki. No balotá nada, pasobra tur dia tin forsanan maligno ku kier kibra i eliminá e logronan. Sea alerta, lesa i mira kiko ta pasando den mundo, pero tambe aki na Boneiru i bo mes ta saka bo konklushon.

FUENTE: NÒCHI WILLEM/LIVE99FM