DIA 27 I 28 DI FEBRÜARI 2025, MIEMBRONAN AFILIÁ NA AFBW A HASI UZO DI NAN DERECHO DI VOTO I A BAI ELEKSHON STATUTARIO PA UN DIREKTIVA PA AFBW PA E PERIODO 2025 – 2027.

Kralendijk,- Votamentu a tuma lugá elektrónikamente/digitalmente kordiná pa e kompania Cyber Bonaire i tabata bou di supervishon di e komishon elektoral di AFBW konsistiendo di sres. Ewald Abdul, presidente, sr. Norwin Willem, sekretario i sr. Eric Vlijt komo miembro.

Despues di a risibí e resultadonan preliminario riba 1 di mart 2025, dia 2 di mart Komishon a bin huntu pa den presensia di deurwaarder di korte komun di hustisia traha un prosès-verbal i ofishalisá i formalisá e resultado final.

E resultado di e elekshon tabata ku 906 miembro por a vota, di kual 466 a hasi uzo di nan derecho di voto. Di e 466 votonan aki 437 tabata bálido, miéntras ku komishon di elekshon a deklará 29 voto komo inbálido pa diferente motibu. Resultado pa kada kandidato tabata komo lo siguiente:

Nòmber                                 SI                                Nò                                    Blanku    

Cherrel Kwidama               429                             4                                              4         

Catharina van Manen        399                             18                                            20       

Miriam Wanga-Markiet      400                             19                                            18       

Jose Capella                        395                             17                                            25       

Lilian Soliana                      396                             20                                            21       

AFBW en general i e komishon di elekshon en partikular ta sumamente kontentu ku e partisipashon haltu di miembronan ku a bai vota e biaha aki. Djies pa un komparashon. Na 2022, 640 miembro por a vota i a bai vota 200 miembro ku ta 31.25%.

E biaha aki 906 miembro por a vota i 466 a bai vota, kual ta representá 51.43%. E resultado aki ta danki tambe na un kampaña agresivo di informashon den un forma direkto ku kada un miembro individual kual kampaña a keda kordiná pa e shopsteward di Bonlab, señora Yasmin Karnabrata huntu ku Limitless Success Buisiness. A keda demonstrá ku traha den ekipo semper ta éksitoso. Pa usa un dicho di presidente Nilco Rollan(q.e.p.d.) Solo El Equipo Gana.

Pa e periodo 2025 – 2027 AFBW tin awor un direktiva ku por konta ku un sosten amplio di su miembresia. Awor falta e mandato kla i raspá pa e proseso di transformashon di AFBW kuminsá pa bai na e nivel di mas profeshonalismo pa asina por brinda e miembresia e servisio ku nan meresé. Si e direktiva nobo ku asistensia di miembronan aktivo logra e tranformashon aki, sindikalismo na Boneiru a drenta un era profeshonal i duradero ku un base fuerte den komunidat ku ta garantisá ku e bos di e klase trahadó ta zona den tur desaroyo sosial-ekonómiko di Boneiru. Enfoke lo mester ta riba formashon, formashon i mas formashon.

I ku esei pioneronan den sindikalismo ku apesar di nan edat ainda ta duna di nan na e klase trahadó por pasa e batuta di konosementu i ekpserensha ku un kurason tránkil pa e generashon nobo. Nos tin entendí ku pronto lo kuminsá ku e kampaña pa informá miembresia di un kurso básiko pa shòpsteward ku lo bai kuminsá.

Un kurso ku lo atendé ku prinsipionan básiko di nos leinan laboral i disputanan laboral i kon pa resolvé esakinan. Nos ta spera ku ora e inskripshon habri pa e kurso aki ku na kada kompania na unda AFBW tin miembro por lo ménos 3 miembro lo inskribí pa e kurso, sea bo ta shòpsteward kaba òf nò. Tambe lo hasi un apelashon riba e dunadó di trabou pa koperá den e formashon aki ya ku un shopsteward bon formá ta di balor agregá pa e kompania na unda e ta traha.

E ta un kontribuyente fuerte pa yuda mantené e trankilidat laboral riba flur di trabou kual ta importante pa produktividat di e kompania.

FUENTE: NÒCHI WILLEM/LIVE99FM