BÈRDAT PROMÉ

Kralendijk,- Maneho di Fundashon ‘Union di Imigrantenan Boneriano’ (FUIB) ta pa semper papia y publiká bèrdat. Nos no ta publiká misinformashon ni disinformashon.

Si ta sali ku nos a publiká algu ku no ta kuadra ku bèrdat, nos ta pidi diskulpa y lo rektifiká.

Den nos último komunikado nos a skirbi lo siguiente:
“Tambe nos ta tende ku imigrantenan mester pasa trempan na IND pa saka number. No ta problema pa warda bo beurt, pero si bo mester akudí na IND for di 6’or di mainta (of mas trempan) pa bo haña bo number (si nò, bo no ta wòrdu yudá), e ora ei esei ta otro ehèmpel di mal servisio”.

IND (ofisina di imigrashon) a hala nos atenshon ku e informashon aki no ta korekto. Nos ta kere nan palabra. Ta p’esei nos a pidi diskulpa personalmente kaba. Y pa medio di e komunikado aki, nos ta pidi diskulpa publikamente tambe. E rektifikashon ta pa bisa ku NO ta asina ku imigrantenan mester akudí trempan, si nò nan no ta wòrdu yudá. IND a sigurá nos ku tur hende ku ta akudí serka nan, lo haña su beurt.

Si nos ta risibí mas detayes, nos lo publiká eseinan tambe.

Dikon mester publiká bèrdat so? Ta pasobra, disinformashon y misinformashon ta krea konfushon y lo NO yuda e kousa di FUIB, ku ta pa asistí imigrantenan. Ademas, misinformashon y disinformashon hasta tin efekto negativo riba salú mental di nos komunidat. Nos no kier hasi nos mes kulpabel di esei. Solamente bèrdat por yuda nos kousa, imigrantenan y komunidat.

Pues konsientemente nos lo NO publiká informashon falsu nunka. Nos no por gana nada ku esei. Mester tene kuenta sí, ku tin biaha nos fuentenan no a duna nos informashon korekto, of kisas nos a malkomprondé nos fuentenan.

Kon ku sea, pueblo por konfia ku FUIB lo publiká bèrdat so. Si ta sali ku nos informashon no ta kuadra ku realidat, nos semper lo pidi diskulpa y rektifká. 

Tur djasabra Fundashon ‘Union di Imigrantenan Boneriano’ (FUIB) tin un konsultorio hurídiko grátis pa imigrantenan legal of ilegal di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

FUENTE: FUIB/LIVE99FM