Redakshon
Oranjestad – Ekonomia di Aruba ta cresiendo rapidamente.
E finansas gubernamental tambe ta mustra un imágen positivo. For di 2022, ta stipulá e presupuestonan na tempu. Sinembargo, e informashon di hustifikashon ta atrasá, manera e entrega lat di tantu e informenan di implementashon komo e kuentanan anual ta mustra. Esaki ta mina e derecho presupuestario i e funshon di kontrol di Parlamento. CAft ta haña ta positivo ku a inisia un trayekto di mehorashon pa duraderamente pone na òrdu e maneho finansiero. Awor ta importante pa Aruba duna pasonan kontundente i duna prioridat na e trayekto di mehorashon.
Siklo di presupuesto i hustifikashon
A ofresé e proyekto presupuestario pa 2025 na Parlamento na tempu. Tantu pa 2025 komo multianualmente, e presupuesto ta kumpli ampliamente ku e norma presupuestario sentral ku ta preskribi ku mester tin un surplus di un minimo di 1 porshento di e produkto nashonal bruto. CAft ta apresia e resultadonan positivo aki.
Sinembargo, e proseso di implementashon i hustifikashon ainda ta laga di deseá. Tantu e informenan di implementashon komo e kuentanan anual ta ser entregá lat. For di final di 2022, e retraso den e entrega di e informenan di implementashon a asendé te un kuartal. Debi na esaki, CAft i Parlamento no por evaluá sufisientemente e grado di realidat di e presupuesto, i esaki ta limitá nan den e implementashon di nan tareanan di kontrol.
Ademas, Aruba tin hopi retraso den e stipulashon di e kuentanan anual. E kuentanan anual di 2019, por ehèmpel, no a ser ofresé na Parlamento ainda. Pues ainda no ta kla ki dia lo stipulá e kuentanan anual aki.
Trayekto di mehorashon maneho finansiero
Aktualmente, Aruba ta trahando riba un sistema di raportahe nobo, i riba e mehorashon di e kontrol riba ingresonan i gastunan di e pais. CAft ta haña importante pa enfatisá ku e responsabilidat pa bon maneho finansiero ta mas amplio ku solamente Minister di Finansas. Kada Minister lo mester hasi esfuerso pa logra esaki riba su departamentu. Bon maneho finansiero ta importante pa pèrkurá ku ta empleá rekursonan públiko di un manera adekuá, sin malgastá ni abusá nan. Ademas, Parlamento ta haña un miho bista riba e estado finansiero real di e pais. Esaki ta esensial pa un gobièrnu konfiabel. P’esei ta importante pa Aruba logra realisá mehorashonnan signifikante for di awor.
Entidatnan gubernamental
Recientemente, Algemene Rekenkamer Aruba a konstatá fayonan den e maneho di i e supervision riba e entidatnan gubernamental. Serka un kantidat di e entidatnan gubernamental, e hustifikashon no ta na òrdu. Gobièrnu mester vigilá mas estriktamente e deber di hustifikashon di e entidatnan gubernamental. Un falta di transparensia i hustifikashon por kondusí na riesgonan den futuro. CAft ya kaba a pidi atenshon pa mehorashon di e hustifikashon di entidatnan manera Serlimar i Arubus N.V. CAft a bolbe ekspresá su preokupashonnan i ta urgi Aruba pa oumentá e outosufisiensia finansiero di entidatnan gubernamental. Den e marko aki, implementashon di e Ordenansa Nashonal Corporate Governance ta di importansia. Finalmente, CAft ta konstatá un oumento di servisionan gubernamental ku ta ser ehekutá remotamente, sin ku a supstansiá esaki debidamente.
FUENTE:CAFT ARUBA/LIVE99FM
GIPHY App Key not set. Please check settings