AKSIDENTE SERIO ENTRE SUV I SKUTER RIBA EEG BOULEVARD

Kralendijk, – Tabata algun ratu pasa ku sentral di polis a keda notifika di un aksidente ku a tuma luga riba EEG Boulevard entre un skuter i un SUV. Na yegada di patruya na e sitio a bin topa ku un dama ku tabata drumi kantu di kaminda, un skuter di boltu den kura di un kas i un suv.

Mesora a pidi sentral pa dirigi e personal di ambulans pa e sitio ku na nan yegada, mesora paramendikonan a duna e viktima e prome asistensia i pa despues transporte ku urgensia pa poliklinika pa tratamentu mediko avansa.

Na e sitio por a kompronde ku tantu e suv i e skuter tabata bayendo direkshon Playa. E skuter dado momentu mester a bai pasa un outo i tabata na e mes un momentu ku e shofur di e suv ta lora na su man lenks ku konsekuensia ku e skuter a dal den e suv.

E personal di trafiko a presenta na e sitio pa hasi nan investigashon, mientras ku segun e lei di botsen is blazen a hasi un prueba di supla ku e shofur di e suv ku a sali negativo. E personal di CRS tambe a presenta na e sitio pa registra i atende ku e aksidente aki.

FUENTE: LIVE99FM