MUCHANAN DI BONEIRU TA EKSPERENSIÁ AVENTURA RIBA UN BARKU KRUSERO PA MEDIO DI KOLABORASHON ENTRE TCB, CARNIVAL HORIZON I BUKI DI PRÈT

Kralendijk – Tourism Corporation Bonaire (TCB), den kolaborashon ku Carnival Horizon, ofisina di haf di Boneiru i Buki di Prèt, eksitosamente a organisá ‘Bonaire Cruis Adventure for Kids – Aventura Krusero pa Mucha di Boneiru’. Di e manera akí un grupo di mucha di Boneiru a haña un oportunidat úniko pa eksperensiá bida na bordo di un barku krusero.

E organisadónan a bini ku e inisiativa akí pa brinda muchanan di Boneiru un eksperensia edukativo i inolvidabel i na mes momentu laga nan sera konosí ku e sektor di turismo krusero i e hopi posibilidatnan ku esaki tin di ofresé. Durante e bishita e muchanan a eksplorá diferente parti di e barku, nan a siña mas tokante e aspektonan operashonal di un biahe krusero, i nan a gosa di un dia yen di deskubrimentu, momentunan edukativo i dibertishon.

“Krea eksperensianan signifikativo pa nos komunidat lokal ta un parti importante na momentu di sabaguardiá ku turismo ta na benefisio di habitantenan di Boneiru”, segun Elesiër Angel, direktor di Tourism Corporation Bonaire. “E kolaborashon aki a permití nos muchanan haña mihó konosementu di e industria krusero miéntras ku na mes momentu nan a eksperensiá algu ku hopi di nan kisas no tabatin e oportunidat di hasi promé.”

E evento a bira posibel pa medio di kolaborashon ku i sosten di Carnival Horizon, ku a yama nos muchanan bon biní na bordo i a sòru pa ​​un programa atraktivo, ku entre otro un rekorido bou di guia riba e barku i un lùnch.

Siguridat i bienestar di tur e partisipantenan a keda un promé prioridat durante henter dia, ku guianan i organisadónan trahando huntu pa garantisá ku e muchanan tabatin un eksperensia seif i plasentero.

TCB kier a gradisí Carnival Horizon, Buki di Prèt, e muchanan ku a partisipá, nan mayornan i nan guianan pa nan sosten, di manera ku e dia spesial akí a bira un éksito.

Pa medio di inisiativanan manera ‘Bonaire Cruise Adventure for Kids – Aventura Krusero pa Mucha di Boneiru’, TCB ta sigui fortifiká e konekshon entre turismo i nos komunidat lokal pa medio di krea oportunidat pa enseñansa, konsientisashon i eksperensianan kompartí.