MI A TUMA NOTA KU NOS KOMUNIDAT TA SINTI E DESAPUNTA I SIN KONFIANSA DEN NOS, KOMO POLÍTIKONAN.

Kralendijk,- E situashon di intrankilidat den gobièrnu i e retiro di diputado Statia a krea inseguridat i preokupashon den nos komunidat.

Komo representante di pueblo, mi ta sinti e responsabilidat pa trese trankilidat i konfiansa bèk. Na e momentu aki, nos ta buskando intensivamente den koalishon un solushon pa nos por sigui sirbi i sostené nos pueblo te na mart 2027.

Nos a hasi promesanan na nos habitantenan, i mi ta spera ku nos por pone nos diferensianan na un banda i pone e interes di pueblo na promé lugá. Solamente dor di traha huntu nos por restablesé e konfiansa di nos habitantenan i kumpli ku promesanan ku nos a hasi.

Ademas, mi ke duna di konose ku semper mi a sa di tin un bon kolaborashon ku diputado Statia. P’esei mi ta lamentá su retiro. Mi ta spera ku nos por jega pronto na un solushon den koalishon i informá nos komunidat na un manera kla tokante e siguiente pasonan.

Pa mi, e motibu prinsipal pakiko a pidi diputado Statia pa laga su funshon ta relashoná ku komunikashon i kolaborashon. Mi ta konbensí ku nos por traha riba esaki huntu dor di hasi akuerdonan kla tokante komunikashon, responsabilidatnan i ekspektativanan. Tambe ta hopi importante pa nos respetá otro den su funshon i ku nos trata otro ku respet i profesionalismo. Solamente asina nos por sigui traha efektivamente den interes di nos pueblo.

E bienestar di nos pueblo mester keda sentral den tur desishon ku nos ta tuma. Esaki ta i lo sigui ta mi prioridad mas haltu. Netamente aworaki ta un momentu super importante pa nos tuma nos responsabilidat, ofrese stabilidat i traha riba solushonnan ku ta na benefisio di nos komunidat.

Huntu nos por superá e situashon aki i sigui traha pa un futuro fuerte, stabíl i mihó pa tur habitante di Boneiru.

FUENTE: FRAKSHON SERBERIE