ANOCHI DI DIALOGO LANTA ‘RIBA TOKANTE KOLORISMO NA MANGAZINA DI REI

Kralendijk – Mangazina di Rei ta organisá Anochi di Diálogo Lanta’riba tokante kolorismo i ta invitá komunidat Boneriano pa reflehá huntu riba un tema ku ta profundamente mará i ankrá den nos pasado kolonial pero tambe den nos realidat aktual.

Kolorismo ta keda un efekto tangibel di nos pasado di sklabitut i ta sigui influensiá kon nos ta mira nos mes i otro. Durante e anochi aki, nos lo krea un espasio seif pa kompartí eksperensianan, amplia perspektiva, i eksplorá huntu kon nos por kibra patronchinan dañino.

E enkuentro lo ta un eksperensia interaktivo den kua nos lo reflehá riba identidat, beyesa, i herensia kultural. E meta ta pa empoderá otro den laga huisionan bieu bai i brasa un imáhen propio más poderoso i remarkabel.

Tur hende ta bon biní, si bo ta konosí ku e tópiko òf simplemente kurioso.

Nos ta un komunidat. Ban dialogá i krea nos futuro ku rèspèt pa otro. Djòin e kombersashon i kompartí bo pensamentunan.

E anochi di dialogo Lanta’riba lo tuma luga riba e siguiente fechanan na Biblioteka Públiko: 11 di yüni 2026:                                   18:00 – 21:00

18 di yüni 2026:         18:00 – 21:00

E programa di dia 11 i día 18 ta meskos

Mia Merveille-Tweed lo ta e fasilitadó di e anochi aki.

Idioma di e diálogo: Papiamentu

E anochi di diálogo Lanta’riba ta parti di e programa di Luna di Emansipashon i ta wordu hasi posibel danki na e sosten di Entidat Públiko Boneiru i Herdenkingscomité Slavernijverleden.

FUENTE: MANGAZINA DI REI/LIVE99FM