POLÍTIKA DERECHISTA NA HULANDA TA USA LIBERTAT DI EKSPRESHON PA ATAKÁ BUSKADÓNAN DI ASILO I IMIGRASHON PA DUNA FORSA NA E POLÍTIKA DI LIMPIESA.

Kralendijk,- Nos konosé historia di gueranan di krusada religioso, na Spaña ku limpiesa di sanger, Adolf Hitler ku su lebensraum – espasio pa biba – i Mussulino ku fasismo. Ta enfoká riba un grupo ku ta distinto di nan pensamentu. No lubidá nan ta den liña di diskriminashon. Mi no ta bai duna lès di historia ni konta storia, sí mi ta referí na ekspreshonnan ku nos ta tende na Bonaire manera; nos identidat i mentalidat. Esaki no ta nada mas ku mustra ku nos ta distinto i nos tin un status mas altu òf ménos ku otronan ku no ta nos. Esaki ta “diskriminashon” Mi ponensia ta ku e aktitut aki ta di pensamentu smalitu ku ta choka ku pensamentunan progresivo ku mi ta mira den hóbennan ku poseshonnan klave ku ta karga responsabilidat pa logra un komunidat sano i progresivo. Wak nos abogadonan hóben, direktor di WEB, TCB, biblioteka, di bankonan, di mundu komersial, presidentenan di organisashon sosial, Mariadal, Aeropuerto, den aviashon, gezaghèber, diputado, sekretario di teritorio insular, hefe di polis i di skolnan, lidernan polítiko i awor Jolinda di UPB. Ta personan ku ta dominá mundu di komunikashon moderno huntu ku ekspertonan ku ta den e disiplinanan menshoná. Aseptá ku hóbennan ta na poder kaba. Lo ta un barbaridat si ami hera pensa pa kritiká maestronan di historia na tur skol na Bonaire pa e simpel echo ku nan sa mas i ta mihó ku tempu ami a duna lès di historia. Socrates su sabiduria ta, “Mi sa ku mi no sa nada” ku ta nifiká e úniko sabiduria ta, pa sa ku bo no sa nada. Ken tabata kontra imigrantenan manera; Sin Nashon, Medardo de Marchena, Karl Mayer, Brandler, Heitkönig,Tjing Asjoe, Abdul, Abraham, Saleh, Gerharts i Libo Sealy. No ta eksistí ni identidat ni mentalidat boneriano. Ami no ta partisipá den e diskushon sin fin ei.  

FUENTE: ARTHUR SEALY