ARUBA: EVELYN WEVER-CROES: PARLAMENTO NO POR BIRA UN INSTITUTO DI SILENCIO

Oranjestad – Lider di Fraccion di MEP Evelyn Wever-Croes a manda un carta fuerte na Presidente di Parlamento, Marlon Sneek, expresando su profundo preocupacion cu durante e reunion di Comision di Asuntonan Domestico di dialuna 18 di mei 2026, lo trata solamente asunto administrativo y contratonan, mientras cu asuntonan hopi mas serio y urgente ta wordo ignora.

Den su carta, Wever-Croes a pidi oficialmente pa agrega varios punto importante riba e agenda, entre nan:

•⁠  ⁠e incumplimento repititivo cu Reglamento di Orde pa parti di Presidente di Parlamento;

•⁠  ⁠e falta di contesta di e Presidente riba cartanan di miembro di Parlamento;

•⁠  ⁠e falta di accion pa parti di e Presidente ora gobierno no ta respeta Reglamento di Orde;

•⁠  ⁠e actitud nobo di gobierno AVP Futuro di “pick & choose”, unda ministernan mes ta dicidi cua reunion nan kier atende of no.

Segun Wever-Croes, Parlamento no por sigui actua manera cu su unico responsabilidad ta procesa papel y contrato, mientras cu problema institucional y constitucional serio ta wordo evita.

“Parlamento no ta existi pa laga cos pasa bou mesa. Nos tin un deber pa proteha dignidad, transparencia y funcionamento corecto di nos democracia,” Wever-Croes a declara.

Tambe el a exigi cu tur documento relaciona cu gastonan y contratonan, incluyendo minimo tres oferta pa cada gasto, wordo entrega cu suficiente tempo pa miembronan por studia y evalua nan debidamente prome cu reunion. E reunion ta poni riba agenda pa dialuna 18 di mei.

Wever-Croes a bisa cu e pueblo di Aruba merece un Parlamento cu ta haci su trabou serio, y cu no ta keda keto ora regla nan no ta wordo respeta y ora institucionnan democratico ta wordo debilita.

FUENTE: LIDER DI FRACCION DI MEP EVELYN WEVER-CROES