BONAIRE LIONS CLUB TA EKSTENDÉ SU PROFUNDO APRESIO NA FUNDASHON ALZHEIMER BONAIRE

Kralendijk,- Ku e presentashon sobresaliente, informativo i inspiradó ku a wòrdu ofresé na su miembronan.

Den e seshon signifikativo aki, a profundisá den konosementu riba e malesa di Alzheimer, e reto ku esaki ta trese tantu pa esnan ku ta biba kun’e komo pa nan famia, i riba e trabou inkansabel ku FAB ta hasi pa sostené i guia nos komunidat.

Miembronan di BLC a sali ku un mensahe poderoso: kibra tabú, informá, aseptá i komprondé, i mas ku tur, duna hopi amor ta base fundamental pa kana e kaminda difísil aki ku dignidat i kompashon.

BLC ta reafirmá ku orguyo su disposishon pa kolaborá ku FAB den difushon di nan mensahe i pa trese konsientisashon den nos komunidat. Huntu por traha pa un komunidat mas informá, solidario i yen di amor.

Na final di e presentashon, BLC a tene e honor di entregá un donashon na FAB.

Ku e aporte aki BLC ta yuda den e proseso di edukashon, guia i sosten pa trese alivio na tur esnan ku mester.

FUENTE: BONAIRE LIONS CLUB/LIVE99FM