AWE NOS TA SERA E SIKLO KU E DI KUATER I ÚLTIMO EDISHON DEDIKÁ NA E SEGURIDAT I SALÚ DI E AMBIENTE DI TRABOU PA ASINA LOGRA KU TRABOU TA UN PLASER I NO UN KASTIGU.

Kralendijk,- Ku traha den un ambiente sigur i saludabel i ku un rekompensa hustu ku rèspèt, rekonosimentu i balorisashon di e trahadó lo alsa motivashon, lo alsa e produktividat, lo stimulá kompañerismo i solidarismo na trabou.

Ademas a mustra ku un bon komunikashon habrí i transparente lo laga e trahadó sinti ku e ta parti di e famia di e kompania i  ku ta balor’é i ku ta krea oportunidatnan pa su desaroyo i kresementu personal den e kompania. Awe nos kier papia riba

Maneho di preshon i strès di trabou. Un preshon haltu di trabou i un strès króniko por tin influensha negativo riba e ambiente di trabou. Ora ku koleganan kontinuamente ta bou di preshon i no tin un balansa entre trabou i bida privá, esaki por kondusí na sobrekansansio, burn out i prestashon abou. Ata’ki algun strategia pa manehá i dominá preshon di trabou i strès:

• Sostené e balansa entre trabou i bida privá. Enkurashá trahadó pa nan mantené un balansa saludabel entre trabou i bida privá. Si ta nesesario ofresé oranan di trabou fleksibel, traha na kas, duna fakansi, tene kuenta ku sirkumstansianan di e famia.
• Bin ku programa pa kontrolá strès.  Implementá programanan ku ta brinda e trahadó téknikanan i instrumentu pa baha strès. Esaki por dor di duna entrenamentu kon relahá e mente, tayernan di trabou tokante kon anda ku strès i akseso na posibilidatnan ku ta enserá inisiativanan di salú i bienestar. Den esaki basta tempu sindikato ta promové e asina yamá presupuesto di vitalidat den CAO-nan. Kompania i sindikato tin tur interes pa e trahadó ta salú físikamente pero sigur mentalmente. Un trahadó ku kontinuamente ta mèldu malu pa 99% ta konsekuensia di origen mental, entre otro preshon haltu di trabou, strès i un ambiente no agradabel di traha.
• Pèrmití orarionan fleksibel i atmití pousanan. Duna e trahadó e posibilidat pa adaptá su orario di trabou i pa tuma ku mas regularidat un pouze, Esaki por yuda na oumentá e produktividat i baha´strès.

Un esfera/ambiente negativo di trabou no ta originá sin mas. E ta eksigí atenshon i kurashi pa kibra patronchinan ku ta kousa esaki. Ku entrenamentu tokante UN TIM SOSIAL I SIGUR bo ta krea komo ekipo un base fuerte pa un mehorashon permanente ku mas konfiansa, mas transparensha i un responsabilidat kompartí.

Mi kier konkuí e seri di edishonnan aki  ku e siguiente tepnan pa tantu sindikato shòpstewardnan, i tambe gerensia. Stimula komunikashon habrí; Promové traha huntu; Perkurá pa un balansa entre trabou i bida privá; Rekonosé i balorá prestashonnan di e trahadónan i invertí den entrenamentu di ekipo pa promové solidarismo i kompañerismo na trabou.

I manera nos a kuminsá e seri aki nos kier ser’é tambe: ku un yamada na tur kompania en general ku ta operá riba nos isla pa traha huntu ku nan tim di trahadó dentro di nan kompania i sindikato riba un ambiente laboral positivo, Ora trahadó sinti ku ta respeté, ku ta rekonosé i ku ta rekompensé den un forma hustu e lo tin mas gana di keda traha na e kompania i desaroyá su abilidat i konosementu mas leu. Trabou ya no mester ta un kastigu sino mas bien un plaser i parti integral di su desaroyo personal, kaminda e ta gana su pan di kada dia pa kria su mes i su famia. E ekipo ku ta risibí rèspèt i apresio, ta krese huntu i logra mas. E dunadó di trabou huntu ku e trahadó tin ku krea e ambiente pa e trahadó por ekselá tantu na benefisio di e kompania, na benefisio di e komunidat i na su propio benefisio..

FUENTE: NORWIN NÒCHI WILLEM/LIVE99FM