NOS TA KONTINUÁ KU E SIKLO DI HUNTU, ESTA SINDIKATO, SHÒPSTEWARD I GERENSIA DI KOMPANIANAN MESTER INVERTÍ PA KREA UN AMBIENTE DI TRABOU SIGUR I SALUDABEL.

Kralendijk,- Ketu bai ta konta ku trabou no mester ta un kastigu, sino parti di desaroyo sano di e trahadó kaminda ku plaser e ta kontribuí ku su produktivdat i motivashon na kresementu di e empresa na unda e ta laborá i ku tur mainta a lanta bai ku plaser.

Un di e puntonan ku por ta di influensha pisá na boka di trabou ta e sentimentu di e trahadó ku no ta balorá su trabou i no tin trato igual. Si trahadónan haña e sentimentu ku no ta rekonosé nan esfuersonan i ku tin trato desigual esaki por kondusí na demotivashon i malkontentu.

Den e edishonnan anterior ya nos a trata e  R di Rèspètpa e trahadó.E otro dos di e tres R-nan ku ta forma e pilar sindikal ta Rekonosementu i Rekompensa igual di e trahadó. P’esei mester stimulá netamente rekonosementu i igualdat i pa hasi esaki por tuma e siguiente pasonan.

Pago husto i honesto. E empresa mester perkurá ku e sistema salarial ta transparente i ku tin un forma pa evaluá a base di kriteria ophetivo.

No mester ta asunto di ken gusta ken, pero den un forma transparente tin  un kas salarial, den kua ta deskribí e funshonnan, ta balorá e funshonnan i ta mara e funshonnan den un kas salarial konsistiendo di sea e sistema será ku schaalnan ku kada schaal ku su x kantidat di trapi pa subi òf ta usa e sistema habri di mínimo i máksimo. Banda di esei semper por usa e sistema di un prima di apresio pa trabounan ekstraordinario ku e trahadó presta.

Promové diversividat i inklusividat: Arikulo 1 di nos konstitushon ta bisa ku nos tur ta igual i ku no por deskriminá pa ningún motibu. Pues mester apliká e prinsipio aki riba flur di trabou tambe. Asina ta krea igualdat di trato pero alabes perspektivanan dentro di e ekipo ku ta stimulá motivashon i produktividat pa kada ken a base di su talento i  potenshal por krese den e empresa.

Oportunidat pa krese i desaroyo personal: Un empresa saludabel ta ofresé su trahadónan oportunidatnan pa krese profeshonalmente i desaroyá nan nivel. Esaki nan por hasi dor di ofresé treiningan speshal, tayernan di trabou, dia di estudio i konferensha. Un koperashon den esaki ku e sindikato lo ta ideal. Ku esaki ta duna rekonosementu na e trahadó i ta duné posibilidat pa ekspandé su konosementu i abilidatnan. Esaki ta hustifiká atrobe su rekompensa.

E importansia di rekonosementu i rekompensa ta ora gerensia di e empresa por yega serka su trahadónan i bisanan ku tur frankesa

Bo ta klave den e éskito di nos kompania; bo trabou ta hasi e diferensha; bo kreativdat i pashon ta stimulá nos pa alkansá lgoronan nobo. Danki pa bo entrega i kompromiso ku nos; nos ta konfia den bo abilidatnan i konosementu i nos ta sigur ku bo por superá kualke desafio ku presentá; nos  ta balorá i apresiá bo trabou i nos ta tuma bon nota di bo dedikashon i esfuerso; bo aktitut ta kontagíá henter e ekipo; bo ta un ehèmpel di konsistensia i energía positivo.

Dr Martin Luther King den un di su speechnan pa ku trabou a bisa Un hende mester hasi su trabou asina bon ku esnan na bida, esnan ku a fayesé i esnan ku tin ku nase ainda no por hasi’é mihó kuné. Ami ta pone aserka. E dunadó di trabou tin ku krea e ambiente pa e trahadó por ekselá tantu na benefisio di e kompania, na benefisio di e komunidat i na su propio benefisio..

FUENTE: NORWIN NÒCHI/LIVE99FM