BONAIRE HUMAN RIGHTS TA MARKÁ PRESENSIA I AKSHON HISTÓRIKO NA NASHONAN UNÍ, AMPLIFIKANDO BOSNAN DI MUHER I MUCHANAN MUHE DI BONEIRU  

Kralendijk,- E Organisashon di Derechonan Humano di Boneiru (BHRO) a sera un siman históriko di partisipashon na Nashonan Uní ora ku nan a bandoná Boneiru riba 28 di Januari, despues di organisá un lektura legal tokante e kaso di Boneiru, presentá pa Dr. Byron-Cox. E siman aki a marká un logro notabel kaminda e bosnan di muher i muchanan muhe di Boneiru no solamente a wòrdu skuchá, sino tambe a wòrdu rekonosí personalmente na e mas haltu nivelnan di Nashonan Uní.

Komo parti di su trabou kontinuo di abogasía, BHRO a partisipá na e Civil Society Town Hall ku Su Ekselensia Annalena Baerbock, Presidenta di e 80 (ochenta) Seshón di e Asamblea General di Nashonan Uní a tene riba 29 di Januari ultimo na e Sede di e Nashonnan Uní na New York. E partisipashon aki tabata parti di e esfuersonan mas amplio di BHRO pa lanta konsenshi internashonal riba defisiensianan demokrátiko, desigualdat di género i strukturanan kolonial di gobernansa ku ta sigui afektando Boneiru.

Riba diabiernès, 30 di Januari, BHRO a hasi un intervenshon formál durante e “Global Multi-Stakeholder Hearing” –  komo preparashon pa e 70 (setenta) Seshón di e Komishon riba e Status di Muher (CSW70). E intervenshon a pone lus riba e realidatnan bibu di muher i muchanan muhe na Boneiru, kende ta sigui enfrentá eksklushon sistemátiko for di toma di desishon, oportunidatnan ekonómiko i akseso na servisionan públiko.

Atenshon spesial a wòrdu duna na e marginalisashon kontinuo di e idioma lokal Papiamento den skolnan, gobernansa, hustisia i sistema institushonal—un eksklushon ku ta reforzá desigualdatnan i ta esklui I silensia e partisipashon di e komunidat.

E multi-stakeholder hearing, un elemento klave di e proseso di revitalisashon di CSW i di e Pakto pa Futuro di e Nashonan Uní, a reuni aktornan di sosiedat sivíl for di tur parti di mundo. Den e foro aki, BHRO a enfatisá ku igualdat di género no por wòrdu logra unda strukturanan kolonial, konsentrashon di poder ekonómiko i práktikanan polítiko korupto ta nega komunidatnan e derecho pa partisipá di manera signifikativo den aspira I forma nan propio futuro.

Despues di e intervenshon di BHRO, un momento extraordinario i inesperá a surgi. Su Ekselensia Nyaradzayi Gumbonzvanda, Sekretario-Generál Asistente di Nashonnan Uní, a pidi un reunion personal ku representantenan di Bonaire Human Rights Organization. Pa medio di su ofisina, e delegashon di BHRO a wòrdu invitá pa papia direktamente ku Gumbonzvanda—un gesto di rekonosemento sin presedente.

Su Ekselensia a ekspresá ku e testimonio tokante Boneiru a toke profundamente, rekonosiendo e impakto humano, kultural i sosial di e problemátikanan presentá. E a pidi informashon di kontakto direktamente ku BHRO, señalando un kompromiso kontinou na e mas haltu nivel di Nashonan Uní.

“E momento aki ta representá un kambio for di invisibilidat di hopi aña pa rekonosementu direkto,” BHRO a deklará. “E ta konfirmá ku ora komunidatnan ta papia kla i ku kurashi tokante inhustisia, ni sikiera sistemanan fuertemente establese no por sigui ignorá nan.”

BHRO a enfatisá ku e partisipashon I akshon aki ta fortalesé BHRO su kompromiso pa sigui defendé derechonan, dignidat i visibilidat di muher i muchanan muhe I pueblo di Boneiru en general, i pa aspira I traha pa logra basá riba konsentimentu, partisipashon i respet kultural den gobernansa i autodeterminashon.

FUENTE: BONAIRE HUMAN RIGHTS ORGANIZATION