Kralendijk,- Sesenta aña pasá a funda AFBW, e SINDIKATO GENERAL DI TRAHADONAN BONERIANO ku un mishon kla: sali pa derechonan, dignidat i protekshon sosial di trahadónan i nan famia na Boneiru. Seis desenia despues e sindikato ta selebrá e logro históriko aki ku un programa variá, den kua pasado, awe i futuro ta bin huntu.
Durante henter e siman Boneiru ta den lus di un historia riku i di nifikashon duradero di sindikalismo. E aktividatnan festivo ta trese generashonnan huntu i ta ofresé espasio pa para ketu na e adelantonan sosial ku a logra den e sesenta añanan.
Ta habri e siman djaluna 16 ku un marshe di informashon kaminda tur hende ta bonbiní pa haña informashon riba leinan sosial, provishonnan sosial i areglonan di supsidio. Diferente instansia manera SZW, AKSESO i KOMUNIDAT I KUIDO lo ta presente pa kontestá pregunta i informá e bishitantenan riba nan derechonan i posibilidatnan. E marshe lo ta habrí di 4”or te ku 6”or di atardi den kurá di AFBW.
Un parti interesante di e programa ta un eksposishon fotográfiko permanente den Kas Sindikal tambe habrí di 4’or pa 6’or tur atardi. Ku ayudo di FUHIKUBO. A base di potrètnan históriko nos ta biaha den un forma impreshonante den tempu, desde fundashon di AFBW na 1966 te na e organisashon di awe. No solamente e eksposishon ta lagabo mira momentunan di e historia sindikal, pero tambe e hendenan ku pa años boluntariamente a dediká nan mes pa mihó kondishonnan laboral, hustisia sosial i un desaroyo sosial hustu riba Boneiru.
Pa amantenan di historia i storia AFBW ta organisá un anochi di pelíkula ku un dokumentario tokante e desaroyo di sindikalismo i huntu ku esaki lo tin rondó di un kandela(kampvür) un anochi di konta kuenta. Tur hende ku a eksperenshá kualkier suseso sindikal, manera eks miembronan di direktiva, lidernan sindikal o miembronan lo konta nan rekuerdonan personal na entre otro akshonnan sindikal manera welga, negosashonan i viktorianan ku huntu a forma e historia sosial di nos isla. E ta primintí di bira un anochi den kual eksperensha, emoshonnan i konosementu lo keda traspasá pa e generashon hóben.
Famianan tambe lo partisipá aktivamente na e selebrashon. Lo tin un dia di deporte familiar den kua enkuentro, relahamentu i solidaridat lo ta sentral. Ku e balioso koperashon di INDEBON lo krea un dia alegra, kaminda famia, amigunan lo topa otro den un ambiente alegre i agradabel.
Kulminashon di e siman ta djadumingo 22 di novèmber ku un resepshon festivo den klup Sosial Cafe. Durante e enkuentro speshal aki no solamente lo para ketu na 60 aña AFBW, pero lo honra tambe e hendenan ku a duna un kontribushon speshal na kresementu i desaroyo di e organisashon. Diferente persona di influensha den e historia di AFBW lo risibí distinkshon pa nan dedikashon i liderato.
E hubileo ta mas ku un selebrashon di pasado. E ta tambe un momento di reflekshon riba futuro di labor, protekshon sosial i solidaridat riba Boneiru.
“Sesenta aña AFBW ta nifiká sesenta aña di lucha, koperashon i adelanto. E ta un homenahe na tur ku a defendé e interesnan di e trahadó i na mes momento e ta un yamada na generashonnan nobo pa kontinuá ku e tradishon.
Ku e siman di selebrashon aki AFBW ta suprayá su ròl permanente komo organisashon sosial ku ta dediká su mes pa hustisia, trabou digno i un komunidat fuerte. Ta honra e pasado, ta selebrá awe i nos ta drenta futuro ku un konfiansa fuerte.
FUENTE: NORWIN NÒCHI WILLEM, KONSEHERO USIBO



GIPHY App Key not set. Please check settings