SEMII MARTEN RUMBO PA CALLE 8, MIAMI MUSIC FESTIVAL

Kralendijk,- Despues di un gira eksitoso na Sto. Domingo ku lansamentu di 2 kansion  na spañó, Semii ta rumbo pa Miami pa partisipá den e festival musikal di mas grandi na Miami ku ta Calle 8.  

Semii tin e oportunidat pa presentá den Calle 8 riba esenario di Univision ku no ta un kanal deskonosí. Ta soñonan grandi ku den 2 siman di tempu e ta logra kumpli kuné.

E oportunidat pa presentá den Calle 8 ta djis despues ku dia 4 di mart Semii Marten den un evento ofisial pa tur periodista i media di komunikashon di Santo Domingo a estrená dos kansion i videoclip ofisial. Durante di e evento akí a toka i estrená e videoclipnan ofisial kaminda media i tambe diferente artista legendario di Santo Domingo tabata presente.

E dos kantikanan akí ta bai ta riba Youtube i pronto tambe riba tur plataforma di streaming. 

E kantikanan ta titulá ‘Que me baile el’ i ‘Papi Miel’ i ta produsí pa un producer di Santo Domingo Julio Feliz ku ya tin hopi aña trahando ku diferente artista latino grandi  den género di merengue i salsa  manera Andy Ventura , Miriam Cruz i Ramon Orlando.

Por sierto Andy Ventura,  Ramon Orlando i diferente representante di algun artista mas tabata presente na e lansamentu. Hasta Andy i Ramon a subi esenario i dirigí algun palabra ku hopi elogio pa loke nan a tende. Spesialmente tabata un honor pa tende e legendario Ramon Orlando ku a papia basta largu, loke no ta algu masha usual di dje. Despues tabatin entrevista i presentashon bibu na diferente medio di komunikashon entre otro na Telemicro den Extremo a Extremo kaminda artistanan grandi sa presentá, Alofoke Sin Filtro Radio show, Yoryi internacional, Bebeto tv,  Ho magazine, canal 4 i algun otro radio i revista.

Semii a hasi un impakto komo un artista nobo multi-talentoso den e mundu latino i a laga un bon impreshon atras. Pa nan ta remarkabel ku un isla asina chikí manera Boneiru tin talento asina impreshonante.

Aparte di e kantikanan nobo pa e merkado internashonal latino, Semii tin diferente kantika na Papiamentu mes tambe ku ta kla kaba pa por bai lansa den e lunanan benidero.

Semii ta sigui hasi lo máksimo pa kada dia di nobo sigui desaroyá i perfekshoná artístikamente i asina demonstrá ku perseveransia ta paga.