TAYER: “POBRESA DEN BIDA DI MUCHA – UN ENFÓKE HOLÍSTIKO PA APOYÁ MUCHA KU TA BIBA DEN POBRESA PA MÁS ÉKSITO ESKOLAR

Kralendijk,- Akademia Apoyo pa Ekselensia den Karera Eskolar (di Fundashon Apoyo Edukativo Boneiru) ta invitá profesionalnan edukativo na Boneiru pa un tayer intensivo tokante e tema “Pobresa den Bida di Mucha”.

E tayer ta basá riba un definishon holístiko di pobresa i un enfoke integral riba su impakto den desaroyo di mucha i hoben. Lo profundisá partikularmente e impakto di pobresa riba karera eskolar di mucha i hoben na Boneiru.

Pobresa no ta solamente falta di plaka i poko forsa di kompra. E ta inkluí tambe pobresa sosial, emoshonal i moral: esta falta di sostén sosial, inseguridat kontinuo i angustia den bida di mucha, trauma, falta di guia i modelo positivo, i limitashon struktural den oportunidat. Na Boneiru, pobresa ta manifestá den diferente forma — inseguridat alimentario, kalidat abou di nutrishon, negligensha di kuido médiko, falta di material eskolar, falta di trankilidat, strès familiar, aislamentu sosial i falta di perspektiva pa futuro.

Durante e tayer lo kontestá tres pregunta sentral:

Pregunta 1: Kiko ta pobresa i kon e ta manifestá su mes den nos komunidat? Lo repasá diferente definishon teóriko di “pobresa” i krea un panorama real di pobresa di mucha na Boneiru huntuku e partisipantenan. Den esaki lo tene tambe kuenta ku rapòrtnan di UNICEF i Kinderombudsman tokante e situashon di mucha na Boneiru.
Pregunta 2: Kon pobresa ta influenshá muchanan? Tantu den sentido general (kognitivo, sosial, emoshonal, neurológiko i físiko) komo spesífikamente den nan trayekto eskolar (por ehèmpel kon pobresa por debilitá abilidat di estudio i motivashon pa bai skol);
Pregunta 3: Kon por sostené mucha i hoben ku ta biba den pobresa pa mas éksito eskolar na Boneiru? Kuá strategia y método profeshonal edukativo mester usa pa efektivamente sostené mucha ku ta lanta den pobresa?

Investigashon ta mustra ku e impakto di pobresa riba bida di mucha ta toka kasi tur dimenshon di su desaroyo, ta dura hopi tempu, i ta profundo i serio. Pobresa prolongá por influenshá desaroyo di serebro, konsentrashon, regulashon emoshonal i motivashon. Sin un apoyo tempran, konsiente, konsistente, integral i struktural, e riesgo di atraso eskolar i pèrdida di talento ta grandi.

E tayer ta dirigí spesialmente na:

Mèntor di skol sekundario
Maestro general di enseñansa primario
Maestro di remedial teaching
“Zorg-Coordinators”
Demas profeshonalnan ku ta traha ku mucha i hoben den deporte, arte i rekreashon ku, indirektamente i potenshalmente por apoyá e mucha den su karera eskolar

Ta enkurashá tambe esnan enkargá ku maneho di enseñansa riba diferente nivel di enseñansa pa partisipá, entre otro kabesante di skol i amtenar di Departamento Komunidat i Kuido.

Fundashon Apoyo Edukativo Boneiru a desaroyá un modelo integrá di sosten ku ta enfoká riba 6 diferente area di desaroyo, 5 método di desaroyo y hasiendo distinshon den 4 te 5 diferente etapa di edat.

E situashon ta urgente. Muchanan ku ta biba den pobresa na Boneiru mester di nos atenshon inmediato, nos kompromiso serio, dedikashon profundo, i un apoyo profeshonal bon fundamentá.

Pa mas informashon i inskripshon, interesado por tuma kontakto ku nos organisashon pa medio di mailadres: seob.bestuur@gmail.com. Duna nomber i kandidat di persona ku ta registra i si ta relevante, kua organisashon nan ta representá.

E tayer ta:

enserá 2 seshon ku ta riba djamars 17 di mart i djaweps 19 di mart 2026. Mester sigui ambos seshon
riba e orario: 6:00 – 8:30 pm
tuma lugá na Avanti, Antriol.
den idioma Papiamentu.
kosta: 40 $ (ku ta kubri 2 seshon di tayer (total 5 ora di tayer) i material di estudio)

Fasilitadónan ta: Lydia Emerencia i Ramiro Richards.

Huntu nos por hasi diferensia den bida di nos muchanan na Boneiru.

Direktiva di Fundashon Apoyo Edukativo Boneiru. Akademia Apoyo pa Ekselensia den Karera Eskolar

FUENTE: FUNDASHON APOYO EDUKATIVO BONEIRU/LIVE99FM