AWE NOS TA DEDIKÁ NA E IMIGRASHON LABORAL.

Kralendijk,- Imigrashon laboral ta e grupo di trahadó ku sea riba nan mes òf ku intervenshon di un kompania ta imigrá for di nan pais di origen i bin traha pa un tempu definí serka nos aki na Boneiru.

Ku años e gruponan aki a krese i a bin forma parti integral di nos komunidat. Ta bon pa nos komprondé pakiko nos tin imigrashon laboral riba nos isla, Na promé lugá ta pa aliviá e falta di trahadó riba merkado den sierto sektor.

Serka nos esaki ta bisto den e sektornan di horeca i turismo, sektor di konstrukshon, sektor di limpiesa, pero tambe den sektor di sierto ofishinan speshalisá.

Imigrashon laboral por ta temporal i/o permanente. Opviamente imigrashon laboral tin su impakto ekonómiko, pero tambe e tin impakto riba diferente aspekto den nos komunidat, manera entre otro nesesidat pa vivienda, pa enseñansa pa kuido pero tambe riba nos sistema di seguridat sosial. Un oro aspekto di imigrashon laboral ta opviamente e trato ku nan ta risibí serka nan dunadó di trabou pero tambe serka nan koleganan na trabou.

Mas i mas nos ta lesa publikashon di kasonan di abuso i eksplotashon di e trahadó imigrante. I mas i mas e kasonan ta yega den publisidat pasobra vários ta keda tratá den nos korte komun.

Ta un echo ku e grupo aki ta uno sumamente vulnerabel ya ku su eksistensia laboral, pero alabes su estadia i permanensia riba nos isla ta kompletamente na merset di e dunadó di trabou.

E dunadó di trabou su arma mas poderoso ta ku semper e por kibra e kontrato di trabou ku e konsekuensia ku e traadó i su famia lo mester bandoná nos isla, ya ku su estadia ta mará na su pèrmit di trabou. Kon sindikalismo por yuda den esaki.

Na promé lugá ta opviamente ku si e trahadó imigrante for di ora ku e yega i pone su pia riba nos suela e mester afiliá na e sindikato den su sektor.

Pa logra esaki mester bin un diálogo serio entre e departamentu di imigrashon, kual ta duna pèrnit di entrada i estadia, e departamentu di asuntunan sosial i di labor ku ta duna e pèrmit di trabou, e organisashon di dunadónan di trabou ku ta esnan ku tin mester di e forsa laboral i sindikalismo ku ta esun ku tin ku protehá e trahadó kontra abuso i eksplotashon. E tema aki na mi pareser mester subi agènda di Diálogo Sentral i mester haña prioridat.

Sindikalismo semper lo honra i duna rèspèt na e klase trahadó i lo no meskla sindikalismo ku polítika partidista, pero meskos ku na kualkier parti di mundo aki na Boneiru tambe, sindikalismo no por sinta ku man krusá tampoko mira kon un gobernashon ku no ta funshoná ta perhudiká e klase trahadó i su famia. Nos ta referí aki ku kosto di bida riba nos isla a kue un forma ku no tin kòntròl ètòl riba preisnan.

Preis di kuminda, preis di awa i koriente, preis di konstrukshon, preis di hür di kas, preis di pasashi, preis di promé nesesidatnan, preis di transporte ets. a oumentá di tal forma ku sigur atrobe ta e gruponan mas vulnerabel, esta kobradónan di ònderstant, kobradó di penshun di behes ku e penshun ta nan úniko entrada i ganadónan di sueldo minimo ta kayendo sino a kai kaba den pobresa.

I ta netamente esaki sindikalismo a lucha pe for di 2019 bin ariba i ku por fin na 2023 a subi kaya masalmente ku un demonstrashon i logra ku a drecha e minimo sosial, e penshun di behes i e sueldo minimo.

Pero tur esaki ta bai pèrdi pasobra ta keda mantené na un prinsipio kapitalista di merkado liber ku no ta funshoná riba nos isla pa motibu di su eskala chikí.

UNKOBON a hasi su máksimo esfuerso, Fundashon Tienda pa Konsumidó a i ta hasiendo nan máksimo esfuerso, pero kaminda e desishonnan mester kai, esta den Bestuurscollege i kaminda mester determiná e kuadro di maneho, esta Konseho Insular no tin ni debate riba e tema.

Tur energia ta bai den diskushonnan di polítika partidista, miéntras ku interes di e pueblo en general ta kompletamente neglishá. Sindikalismo ta lamentá ku miéntras e dos motornan di ekonomia esta dunadó di trabou i sindikatonan a traha huntu pa logra, e di tres partner ku ta gobièrno no ta funshoná strobando asina pa nos por alkansá e meta, esta un desaroyo sosial-ekonómiko duradero i sostenibel.

Nos kier bolbe rekordá Konseho Insular ku e promé punto den e akuerdo di gobernashon ta ku lo hiba un maneho di tal forma ku kada kas na Boneiru lo sobra tur luna 30% di nan entrada den nan pòtmòni. Loke nos ta eksperenshá ta nèt kontrali i ningun representante ku nos a duna voto di konfiansa no ta lanta nan bos pa e pueblo i pidi gobièrnu duna kuenta i rason.

FUENTE: NORWIN NÒCHI WILLEM/LIVE99FM