E KARTA DI KONSEHAL SERBERIE TA UN PETISHON SERIO NA LIDER DI DEMOKRAT PA BAI BÈK NA PRINSIPIO DI PARTIDO KU TA ENSERÁ SIRBI PUEBLO A BASE DI; HUSTISIA, TRANSPARENSIA, RESPONSABILIDAT I RÈSPÈT.

 Kralendijk,- E karta ta tambe un atvertensia serio na frakshon di Demokrat ku a laga  M21 i frakshon Vrolijk masakrá Angelica i no a spera ku Nina lo a para solidario ku Angelica i Clark mester a guli e pilchi pa frakshon M21 haña e kartera di finansa. Asta koalishon tabata ke pa Clark baha komo diputado i e kandidato pa bira diputado, segun su palabra, ta konsehal Hellburg-Makaai.

E petishon no a yega serka Clark.  Konsehal Salma a mira hopi bon ku Demokrat ku tres asiento a para bira kos di hunga di M21 i frakshon Vrolijk. Si Clark ta inteligente polítikamente e mester apresiá honestidat di Salma Serberie ku sí a mira e wega di poder a kosto di partido Demokrat.

Mi pregunta ta, kuantu demokrat di rais tin den e koalishon. Na mi opinion ta konsehal Crestian so. Clark ta obligá pa tuma akshon pa motibu ku Demokrat a bira víktima di M21 i frakshon Vrolijk. Clark sa presis e historia amargo di Demokrat sin un Abraham na kabes i un temporada ku solamente un asiento den Konseho Insular.

Clark tin ku puntra Vrolijk ku si e bira miembro di Demokrat kuantu voto e ta trese òf ku kuantu votadó di Demokrat e ta kore kuné. Si Clark drenta Konseho Insular sea Danny òf Rolanda tin ku baha. Salma e asiento ta di bo di akuerdo ku veredikto di hues pues no ansha bo bida i si bo sa ku miembronan di e koalishon ku a kore ku Clark hamas i nunka bo por forma ku un di nan.  

Ta grita : “esun ku kibra tin ku drecha” pero dikon no por bisa “Esun ku traishoná tin ku paga

pa su aktitut” Salma pabien bo si ta fiel na partido i a bisa Clark ban pone “nos partido” na òrdu. 

      

FUENTE: ARTHUR SEALY/LIVE99FM