SERI DI TAYER EDUKATIVO PA KAPASITÁ PROFESHONALNAN EDUKATIVO NA BONEIRU.

Kralendijk,- Fundashon Apoyo Edukativo Boneiru / Stichting Educatieve Ondersteuning Bonaire, lantá na 2016 na Boneiru, ta un organisashon no-gubernamental i no-komersial ku un misión fuerte: Apoya mucha i hóben na Boneiru pa mas éksito den nan karera eskolar.

Nos ta kumpli ku e mishón aki pa medio di varios programa i proyekto, mehorándo e kapasidat di mucha i hóben pa siña, hasi huiswerk, kumpli ku palabrashon, planea nan tempo ets.  Nos ta traha huntu ku skol, edukadó, famía i komunidat pa logra apoyá mucha/hóben den nan karera eskolar.

Te aínda a kumpli ku nos mishón pa medio di nos programa “Mentoría serka di Kas”, den kuá nos ta ofresé mentoría direkto na muchanan di grupo 7 i 8 di enseñanza primario i hobennan di e 2 prome aña di SGB. Pa amplia e formanan pa kumpli ku nos mishón, nos a krea un segmento nobo den nos organisashon: Akademia Pa Apoyo Ekselensia Eskolar: Nos Akademia ta apoyá edukadónan, tanto esnan profeshonal, komo esnan no-profeshonal. Pa medio di diferente aktividat di formashon, nos lo kontribuí pa fortalesé kalidat i efektividat di e apoyo ku ta ofresé mucha i hóbennan na Boneiru.  

Den futuro lo organisá tambe tayer pa mucha i hóben pa fortalesé nan proseso di siñamento, motivashon pa bai skol y formashon riba tur dimenshón ku ta relevante pa nan karera eskolar .

Den aña 2026, nos Akademia ta start sali ku un seri di tayer ku lo tuma lugá den e periodo di febrüari pa yüni 2026. E tayernan ta enserá na total 5 tema ku ta sumamente relevante pasobra nan ta impaktá bida diario i e karera eskolar di mucha i hóben na Boneiru.

E tayernan ta dirigí riba profeshonal i boluntario ku ta apoyá mucha i hóbennan ku ta bai skol. Kada tema ta konsisti di dos (2) seshón, ku lo tuma lugá den e mes siman, i ta na enkargo di 2 òf mas fasilitadó

E temanan lo ta:

1. ÉKSITO ESKOLAR: Kiko esaki ta enserá i kon pa apoyá mucha i hóben en general pa logra esaki? (febrüari 2026)
2. POBRESA DEN BIDA DI MUCHA/HOBEN:  Kiko esaki ta enserá? Kiko ta su impakto riba siñamentu i desaroyo di mucha i hóben na Boneiru? Kon por apoyá mucha/hóbennan ku ta nase i lanta den probresa?  (mart 2026)
3. VIOLENSIA/ABUSO DEN BIDA DI MUCHA/HOBEN: Kiko esaki ta enserá? Kiko ta su impakto riba siñamentu i desaroyo di mucha i hóben na Boneiru? Kon por apoyá mucha/hóbennan den sirkumstansia di violensia i abuso.  (aprèl 2026)
4. STRUKTURA I RELASHON DEN FAMIA:  Kiko esaki ta enserá? Kiko ta su impakto riba siñamentu i desaroyo di mucha i hóben na Boneiru? Kon por apoyá mucha/hóbennan ku ta lanta den diferente struktura familia .  (sea direktamente òf indirektmente. (mei 2026)
5.  ADIKSHON/ABUSO DEN BIDA DI MUCHA/HOBEN:  Kiko esaki ta enserá? Kiko ta su impakto riba siñamentu i desaroyo di mucha i hóben na Boneiru? Kon por apoyá mucha/hóbennan ku ta nase i lanta den adikshon (sea direktamente òf indirektmente.  (jüni 2026).

• Karákter di e tayernan:  práktiko, kombiná ku orientashon teóriko.
• Idioma di komunikashon:  Papiamentu.
• Gastonan: 40$ pa kada tema (esaki ta kubri 2 seshon). Si inskribí pa tur sinko (5) tema ta paga $175
• Pa registrá i más informashón: tuma kontakto via di email di nos Fundashon: seob.bestuur@gmail.com.
• Kantidat máksimo: 20 persona pa kada tema: pues registrá na tempo!

Nos ta invitá tur esnan ku ta ofresé apoyo na mucha i hóben na Boneiru den nan karera eskolar pa partisipá na e tayernan sumamente importante i interesante aki.

Nos ta gradesí e siguiente organisashonnan ku a yuda kubri e gastunan di e program di tayer: Curoil, Orco Bank, MCB Bank y WEB NV.

FUENTE: FUNDASHON APOYO EDUKATIVO BONEIRU/LIVE99FM