FRAKSHON UPB TA KONDENA INTIMIDASHON KONTRA DI KOSEHALNAN

Kralendijk,- Un situashon hopi peligroso pa demokrasia lokal ta tumando lugar. Awor un miembro di konseho insular, esta un konsehal, no por defende komunidat mas.

Konsehal Hennyson Thielman den su pleno derecho pa defende interesnan di pueblo ta wordu intimida dor di Diputado Clark Abraham, ku’n karta di abogado.

Konsehal Hennyson Thielman korektamente a kuestiona un kompra di tereno ku sen di pueblo. Korektamente konsehal Hennyson Thielman a mustra riba e echo ku gobiernu a kumpra un tereno ku ta pertenese na famia direkto di Diputado Clark Abraham.

Pa un montante di alrededor di mei miyon dolar gobiernu di Boneiru a kumpra un tereno na Santa Clara. Anto e desishon di kompra di e tereno, ta gobiernu a publika esaki, indikando presensha di tur tres diputado den e reunion.

Konseho Insular ta e organo ku tin e derecho di presupuesto. Ta Konseho Insular tin e deber di kontrola Kolegio Ehekutivo riba uso di sen di pueblo. Señor Hennyson Thielman ta un konsehal di Konseho Insular. Pues ningun hende no por intimida e konsehal i stroba e konsehal pa hasi su trabou. Si un Diputado, ku ta miembro di un gobiernu, di un forma astuto ta pretende ku e no tin nada di haber ku un kompra di tereno di su famia direkto, esaki no ta motibu pa un miembro di Konseho Insular keda sin hasi su trabou.

Frakshon di UPB ta kondena e forma kon Diputado Clark Abraham a atende ku e kuestion aki. Diputado Abraham tin derechi di defende su aktonan komo mandatario, pero di e formanan adekua den nos demokrasia.

Den e asuntu aki no tin nada di asuntunan personal di Diputado Clark Abraham envolvi. E kompra di tereno keda hasi dor di gobiernu i ku sen di pueblo, pues konsehal Hennyson Thielman ta den su derecho pa kuestiona Diputado Abraham.

No por kuminsa sosode ku kosehalnan ta wordu intimida ku kartanan di abogado i pues strobando e kosehal di hasi su trabou na bienestar di pueblo. E akto di e Diputado ta un akto di kobardia ku mester keda reprocha i sankshona pa komunidat.

FUENTE: FRAKSHON UPB KONSEHO INSULAR DI BONEIRU