Redakshon
Kralendijk,- Isabella Soleano yu di Elvis Soleano, den representashon di tur esnan presente a yama danki pa tur ku dilanti i patras di kòrtina a bin ta lucha for di 2010 pa tene BOPEC habrí.
Tambe ela pidi tur pa sigui lucha pa tene BOPEC habrí pa den futuro su generashon tambe lo por tin un trabou digno pa gana su pan di kada dia. Gezaghèber Edison Rijna den akseptashon di e manifesto ku USIBO a entregá a deklará di a komprondé e mensahe di Isabella Soleano kla i raspá i ku e lo hasi i sigui hasi esfuerso pa kumpli ku e petishon di Isabella.
30 di òktober 2025 5 aña despues e petishon di Isabella ku ela bosiferá na nòmber di tur trahadó di e tempu ei pero tambe na nòmber di trahadónan potenshal pa den futuro no tabata un soño pero un deseo ferviente ku a bira realidat. Bonaire Energy Terminal, un kompania di Curoil Group ku bendishon di gobièrnu di Kòrsou, pues pueblo di Kòrsou a kumpra BOPEC i lo bai sigui operá e terminal aki i lo bin ku otro desaroyonan di gran balor pa ekonomia i kuponan di trabou na Boneiru.
21 di e 28 trahadónan ku a mantené e terminal durante e último sinku añanan ya a sigurá nan pan na momento ku Bonaire Energy Terminal a tuma nan den servisio. Eks trahadónan di BOPEC tambe a haña e garantia di e curator ku e loke BOPEC a keda debe nan lo ser pagá en todo kaso promé e aña aki kaba. I ta sigur ku tantu den e fase di renobá komo den e fase di operashon mas kupo di trabou lo habri tantu direkto komo indirekto.
A lanta un Fundashon den kua a pone fondonan suspstanshal pa sanea e tereno di e terminal ku a keda kontaminá pa produktonan petrolero durante años. Kisas un señal pa nos gobernashon pa evaluá un mesun modelo pa ku saneamentu di Lèntfel na Lagun i Morotin? Ku tur e ehersisionan aki i esnan ku tin ku sigui e terminal por kuminsá ku un buki nobo riba un blachi nobo pa skibi un historia nobo na bienestar di nos ekonomia en general, pero tambe garantia di produktonan petrolero ku lo por nifiká rebaho di preis i finalmente un era nobo kaminda sigur lo tin espasio pa energia alternativa na Boneiru.
Ainda no tin un akuerdo firmá entre Kolegio Ehekutivo i Selibon.
Djabièrnè dia 24 di òktober a hasi promesanan serio dilanti tur trahadó di Selibon durante un reunion na kual tabata presente dos diputado(i uno parsial) gerensia di Selibon, presidente di hunta di komisario di Selibon, direktora di Bonaire Holding, doño di Selibon, Direktiva di AFBW ku su shòpstewardnan i konsehero di AFBW.
Despues di e reunion ku tur trahadó a sigui un reunion formal ku e stakeholdersnan i a konkluí na final ku lo traha un akuerdo den kual ta definí e fondonan ku ta bai ta disponibel, e tareanan ku tantu Selibon i Entidat Públiko lo bai ehersé, miéntras lo repasá e lista di prioridat ku ta riba mesa. Pues un akuerdo ofishal ku repartishon di e responsabilidatnan ku kada ken mester karga. Di parti di sindikato a palabrá ku AFBW lo entregá e pakete finansiero pa loke ta e negosashonnan pa un CAO nobo ku lo mester kuminsá konta 1 di yanüari 2026 i ku un durashon di tres aña, ya ku trahadónan a alargá e CAO bieu ku un aña sin ningun mehorashon. Naturalmente den e pakete AFBW a tene kuenta ku e echo ku tantu Kolegop Ehekutivo komo Konseho Insular huntu a elogiá i balorá e trabou ku e trahadónan a kontinuá hasi bou di sirkumstansianan horibel pa asina garantisá e servisio na komunidat. Elogio i balorisashon su rekompensa ta mihó kondishonnan i sirkumstansianan laboral.
E pakete a keda entregá pa negosashonnan por kuminsá. Pues awor ta warda riba e akuerdo ku Gobièrnu di Boneiru ku Selibon mester firma formalmente pa e problemanan ku Selibon a señalá komo urgente por kuminsá haña solushon.
Ta ku akshonnan konkreto so nos lo por solushoná e problemanan grandi i kompleho di sushi i su tratamentu en general riba nos isla i e problemanan finansiero ekonómiko grandi pero tambe di kondishonnan i sirumstansiananlaboral di Selibon. Tur hende a papia, tur hende a duna opinion, awor mester di akshon i basta papia.
FUENTE: NÒCHI WILLEM/LIVE99FM
GIPHY App Key not set. Please check settings