EKSITOSO CYBERSECURITY CONVENTION 2025: UN SEMINARIO PA INTERKAMBIÁ KONOSEMENTU I FORTALESÉ DEFENSANAN DIGITAL

Kralendijk,- Di 15 pa 17 di òktober, den sala di konferensha di Van der Valk Plaza Resort, a tuma luga un konferensha regional tokante seguridat sibernético bou di nòmber BQ. Cybersecurity.

E evento anual aki su meta prinsipal ta, pa trese huntu partnernan di sektor públiko i privá, pa interkambiá konosementu riba krímen i seguridat sibernétiko, i pa diskutí kon mundu pero en partikular Boneiru ta prepará su mes kontra atakenan sibernétiko ku ta bira kada dia más sofistiká.

E evento a konta ku sosten di partnernan manera Maduro & Curiel’s Bank, Kuerpo Polisial Karibe Hulandes, i Ministerionan di Asuntunan Interno i di Hustisia di Hulanda. Riba e promé dia General Managing Director di MCB Leonard Domacassé a hasi apertura di e día ku tabata speshal pa klientenan komersial di MCB ku a partisipá na e konferensha.

Den un mundu kaminda teknología ta avansá rapidamente, ku inteligensia artifisial (AI) ta parti di bida di tur dia, menasan digital ta sigui krese i evolushoná. E konferensha a brinda un plataforma perfekto pa deskubrí modelonan inovadó di protekshon, fortalesé kolaborashon regional, i promové interkambio di konosementu entre ekspertonan lokal, regional i internashonal.

Durante e tres dianan di e konferensha, sala tabata yen ku profeshonalnan di diferente área i negoshi di Boneiru, Sint Eustatius, Saba, Aruba, Sint Maarten i Kòrsou, ku a bini pa yuda promové un kultura di seguridat digital mas fuerte. Entre e diferente oradornan tabata tin:

• Carlos Martha, Gerente di MCB Group Investigations, ku a kompartí ehempelnan real di kon klientenan ta kai den trampa di phishing, pero tambe a mustra e fenómeno nobo di “vishing”; videonan falsu riba retnan sosial ku ta pidi donashon òf informashon personal.
• Douglas Bencomo, Computer Systems Engineer i CISO di MCB Group, ku a papia riba e impakto ku inteligensia artifisial tin riba seguridat sibernétiko, i kon esaki mes por sirbi komo un defensa ora e keda usá korektamente.
• E Cybercrime Team di KPCN, ku ta representá sektor públiko, a duna un presentashon riba kon investigashon digital ta tuma lugá i kon ta kolaborá ku partnernan lokal i internashonal pa kombatí krímen sibernétiko na Hulanda Karibense (BES).

E mensahe klave ku a sobresalí den e konferensha ta: Nos komunidat mester ta mas resiliente, i adaptá ku inová den e área di seguridat sibernétiko pa protehé su mes kontra menasa i akate sibernétiko ku ta kambia konstantemente.

E organizadó, BQ Cybersecurity, i partnernan ta gradisí tur oradó, partisipantenan i organishashonnan ku a kontribuí pa hasi di e edishon 2025 un gran éksito.

Maduro & Curiel’s Bank komo instituto finansiero, ta ofresé diferente opshon finansiero digital manera Bankomatiko+, Online Banking i mas.

Pesey MCB ta sigui komprometé su mes pa eduká, enrikesé i fortalesé nos komunidat riba diferente tereno entre otro esun teknológiko, ku meta pa kontribuí na un komunidat mas prepará i mas sigur den e futuro digital.

FUENTE: MCB/LIVE99FM