DJARASON AWOR, PUEBLO BONERIANO TAMBE TIN E DERECHO DI EKSPRESÁ SU VOTO DEN E ELEKSHON PA TWEEDE KAMER NA ULANDA.

Kralendijk,- E tendensia ketu bai ta pa pidi hendenan vota riba e partidonan tradishonal.

Masha poko hende ta tuma nota di e programa di partidonan chikí ku hopi biaha no ta drenta gobièrnu pero ku nan ideanan ta esnan ku mas ta kuadra ku nos realidat komo isla, pues komo  komunidat chikí.

Un di nan ta Partido Sosialista di Ulanda , SP dirigí pa un lider hóben Jimmy Dijk. Komo sindikalista i ko-fundador di e Partido Boneriano Sosial, PABOSO, pues eks polítiko mi a analisá kiko SP ta para pe i mi ta kompartí esaki awe ku komunidat boneriano i en espesial ku esnan ku si kier bai vota dia 29 di òktober awor.

Nan ta puntonan ku ta kuadra eksaktamente ku nos komunidat chikí di Boneiru. Lesa ku atenshon i ku bo mente i kurason disidí ku si bo ta duna e Partido aki un bos den Parlamentu Ulandes pa karga e nesesidat- i preokupashonnan real di Boneiru i ku ta sklama pa solushon.

Dignidat humano, igualdat i solidaridat SP ta hasi esfuerso pa konstruí un komunidat liber, habri, i kaminda solidaridat, konvivensia i koperashon ta para na kabes. Progreso ta nifiká eliminá retraso. Boneiru tin hopi retraso pa eliminá tantu fisikamente komo sosialmente i kulturalmente. SP ta skohe pa energia limpi i un medioambiente i naturalesa salú pa hende i animal. Bo ta kòrda nos slogan “ e ta den nos naturalesa”, esta hende simpel pero desente i un isla ku su naturalesa limpi pa nos tur por biba saludabel.

Biba huntu na midi di nos forsa. SP ta lucha pa vivienda pagabel, mihó mantenshon i bon provishonnan. Den Fundashon Cas Boneriano.  Hürdónan mester haña un lugá prominente. De fakto ta nan ta doño di e Fundashon. Riba nivel di bario mester organisá nan na fabor di konstrukshon di kasnan sosial nobo, renobashon i mantenshon.

Repartí kresementu i prosperidat na un manera husto.

SP kier eliminá pobresa i kombatí desigualdat. SP ta boga pa trabou honesto kontra un pago digno. Sosten na empresa chikí i mediano ta di vital importansia. Oumentá sueldo minimo di moda ku no tin trahadó pober mas. Esun ku ta sin trabou of ta imposibilitá pa traha mester haña sosten ku e meresé..

Bon kuido, ayudo i  oportunidat pa esnan ku mester.

SP no ta laga ningún hende keda atras. Bon kuido ta un trabou di persona pa persona, di hende pa hende i ta riba un eskala chikí i disponibel pa un i tur. Kuido no ta un marshe kaminda ta ganamentu plaka ta e meta riba malesa di hende

Enseñansa mester ta aksesibel pa tur hende.

Skol no ta un fabrika di toets. Mester tin klasnan chikí na kantidat di alumno. Enseñasa mester ta un refleho di nos komunidat kaminda tin espasio importante pa nos herensia kultural históriko pa alsa nos nivel di outorèspèt i auto orguyo komo komunidat boneriano. SP kier invertí den nos enseñansa i perkurá pa e fondonan yega tambe den edifisionan moderno i adekuá, material i bon pago di dosentenan. 

Bo ta rekonosé Boneiru su realidat den e puntonan aki? E ta motivabo pa bo vota SP . Lo ta ideal si SP forma parti di un gobierno nashonal ku aksento riba filosofía izquierda, pero si esei mes no ta e kaso, un sosten na SP lo garantisá ku bos di Boneiru pa e próksimo 4 añanan lo resoná den Tweede Kamer den e debatenan, den e komishon pa asuntunan di Reino, den proposishonnan di maneho i den moshonnan pa pone fondonan supstansial pa karga e desaroyo ku bonerianonan meresé después di 391 aña. Nos tambe a gana e derecho pa prosperidat hustamente repartí i garantisá un bienestar di un kalidat di vida digno pa nos i pa nos yunan.

Pues si bo ta bai vota, vota SP, riba Jimmy Dijk.

 FUENTE: NÒCHI WILLEM