BONAIRE HUMAN RIGHTS TA TUMA AKSHON LEGAL INTERNASHONAL NA NASHONAN UNI I OTRO ORGANISMONAN INTERNASHONAL TOKANTE KLASIFIKASHON INKOREKTO DI BONAIRE

Kralendijk,- Bonaire Human Rights a tuma un paso desisivo na nivel internashonal pa nombra Dr. Maxton Scotland, eksperto di SDG Global i Sociedad Sivil di Nashonan Uni ku ta basa na Reino Unido, pa representa Bonaire, Saba, i Sint Eustatius dilanti di Nashonan Uni i komunidat internashonal.

Un karta formal di keho a wordu manda na Alto Komisionado pa Derechonan Humano di Nashonan Uni,  na Konseho di Derechonan Humano, na Sekretariado di Revishón Periódiko Universal di Nashonan Uni, i na Ministerio di Interior i Asuntu di Reino di Hulanda i Ministerio di Asuntu di Eksterior. Dr. Scotland i BHRO a demanda korekshon di terminologia usa pa organismonan di Nashonan Uni i gobierno di Hulanda ku ta referí inkorektamente na e islanan komo “munisipionan spesial” di Hulanda.

E karta ta enfatisa ku e termino legal korekto segun lei Hulandes ta “entidat publiko” (openbare lichamen), entidatnan ku no ta ekivalente ku munisipionan di Hulanda Oropeo.

E komunikashon ta señalá ku e klasifikashon inkorekto aki ta “inkorekto na lei, enganjoso den praktika, i ta perhudika analis di derechonan humano”. E inkorporashon di e islanan den orden konstitushonal Hulandes bao di WolBES i FinBES na 2010 a wordu impone sin e konsentimentu liber i genuino di e pueblo, den violashon di Artikulo 1 di Pakto Internashonal di Derechonan Sivil i Polítiko (ICCPR), ku ta garantisa e derecho di tur pueblo pa autodeterminashon.

E karta ta tuma nota ku den e referendum di 2015, 66% di votantenan di Bonaire a rechaza e status konstitushonal impone, un resultado históriko ku despues a wordu ignora pa Hulanda. Segun Dr. Scotland, esaki ta konsistí den un violashon di lei internashonal i ta mina kredibilidat demokratiko den Reino.

E keho ta delineá algun konsekuensianan pa ku derechonan humano di e klasifikashon inkorekto:

*Ta krea un ekivalensia falsu ku munisipionan di Hulanda Oropeo, dunando un imagen falsu I inkorekto di gobernashon di Bonaire, Saba i Sint Eustatius.

*Ta kambia e realidat di evaluashonan internashonal I di derechonan humano di NU tokante pobreza, representashon, i identidad kultural.

*Segun Ombudsman di Hulanda, 40% di residentenan di Bonaire ta biba bou di linea di pobreza, un situashon ku a empeorá pa falta di mekanismonan di finansamentu igual i medidanan konkreto I efektivo.

 *Protekshon kultural i linguístiko pa Papiamentu idioma lokal ta disminui pa motibu ku ta impone leynan for di Hulanda Europeo.

Dr. Scotland a urgi e Ofisina di Alto Komisionado pa Derechonan Humano (OHCHR) pa emiti guia di estilo pa direkshon di tur entidadnan di NU pa usa “public body of the Caribbean Netherlands (openbaar lichaam)” na lugá di “special municipality.” Tambe a rekomendá ku futuro raportnan di Revishon Periodiko Universal integra e korekshon aki i pidi Hulanda mustra ku e ta kumpliendo ku Artikulo 1 i 2(3) di e tratado di Derechonan Sivil I Politiko.

BHRO a reuni ku representante Hulandes di Ministerio di Interior i Asuntu di Reino i Ministerio di Asuntu di Eksterior durante e 78 Seshon di CESCR na Ginebra, kaminda BHRO a presentá su keho i e karta ku ta eksigi reportahe internashonal korekto i protekshon di Boneiru bou di Artikulo 73 di Karta di Nashonan Uni bao di Teritorionan Sin Propio Gobernashon.

“Esaki no ta simplemente un kuestion di signifikashon di palabra,” James Finies di BHRO a bisa. “Terminologia ta determina rekonosimentu. Pueblo di Bonaire, Saba i Sint Eustatius mester wordu representa ku honestidat I korektamente den tur forum internashonal.”

BHRO, ku akreditashon di Nashonan Uni i ku Membresia Asosia den Komishon di Reparashon di CARICOM, ta reafirma su kompromiso pa defende derechonan, dignidad, i autodeterminashon di pueblo di Bonaire.

FUENTE: BONAIRE HUMAN RIGHTS ORGANIZATION