BONEIRU TA LOGRA ÈKSITO DEN TOYP AWARDS DI JCI DUTCH CARIBBEAN 2025

Kralendijk,- JCI YUB ta sumamente orguyoso pa anunsiá ku dos Boneriano a gana premio den TOYP Awards (Ten Outstanding Young Persons) di JCI Dutch Caribbean 2025, ku a tuma lugá dia 16 di október 2025 na Renaissance Hotel, Kòrsou.

Den e okashon prestigiado aki, Hennyson Thielman a gana den e kategoria di Asuntunan Polítiko, Legal i Gubernamental, mientras ku Semi Maarten a risibí e premio pa Logro Kultural, representando  Boneiru orguyosamente.

E TOYP Awards ta un programa internashonal di Junior Chamber International (JCI) ku ta rekonosé hóbennan eksepshonal ku ta kontribuí den diferente aspekto di komunidat i desaroyo humano. E premiashon di JCI Dutch Caribbean ta resalta talento i liderato den nos región, inspirando otro hóbennan pa sigui traha pa un futuro mihó.

“Nos ta sumamente orguyoso di Hennyson i Semi pa nan kontribushon i dedikashon pa Boneiru,” segun Marie-Louise Alvarado Arroyo, presidente di JCI YUB. “Nan eksito ta reflehá e balor i pashon ku nos hóbennan tin pa sirbi komunidat i krea kambio positivo.”
JCI YUB ta ekspresá su felisidat i gratitud pa tur e partisipantenan ku a representa Boneiru den e premiashon aki, i ta sigui inspirá mas hóbennan pa forma parti di e movimento di desaroyo positivo den nos isla.

FUENTE: JCI YUB BONAIRE/LIVE99FM