Redakshon
Kralendijk,- Nan ta un inyekshon finansiero inmediatamente, un akuerdo di un konvenio di duna servisio entre OLB i Selibon ku tarifanan adaptá na kostonan real i un sosten di ekspertisio pa manehá sushi riba nos isla ku e fin pa sera Lagun i stòp di dera sushi.
A yega e momento awor pa tuma desishonnan formal ku firma i kompromisonan di tur envolví. Awa a pasa hariña i no por warda mas.
I ora nos di sindikato bisa públikamente ku nos no por warda mas ta pasobra nos a karga nos responsabilidat, nos a papia ku tur ku mester a papia kuné i mustra sin bira rònt ku trahadónan di Selibon no por sigui traha bou di e sirkumstansianan aki..
Na 2023 nos a manda e promé señalnan ku un wèlga di 4 dia, kual sakrifisio a keda kargá pa trahadónan so ku tabata konsiente ku nan lo no a haña pago pa e dianan. Apesar di e señal aki e sirkumstansianan na Selibon no a drecha.
En kambio nan a bira pió i ta forma un peliger super serio pa salú i seguridat di e trahadó. Tur hende i instansia ta elogiá e trahadó atmitiendo públikamente ku e trahadó ta sigui duna servisio i sigui traha bou di sirkumstansianan inhumano.
Trahadónan a koperá ku duna un aña mas bou di e CAO bieu. A yega ora pa un CAO nobo den kual ta bai mehorá e kondishonnan di trabou sin mas. I tur ku a grita ku mester rekompensá e trahadó, te awe no a presentá ningun proposishon konkreto pa pone fondonan nesesario pa drecha e kondishonnan aki.
Al kontrali, na e mesun momento, esnan responsabel ta bai bin ku diskushonnan, ta bai bin ku akusashonnan, ta bai bin ku idea i plannan, pero no ta solushoná nèt nèt nada. E debate no ta konsentrá riba e solushon, sino mas bien ku mester entregá un papel, mester bai wak ku kuantu sèn ken por aportá, mester kinipí aki pa baha e montante, OLB ta tuma tarea pa hasi sin ningun plan kon ta bai hasié.
I miéntras ta hiba e diskushonnan aki, Selibon ta anunsiá den medianan ku nan lo mester adaptá nan skema di kue sushi di kas, debí ku nan no tin ekipo adekuá pa hasi e trabou. Den siman ariba tabatin solamente un trùk di sushi den operashon pa henter Boneiru ku su alrededor di 10 mil kas pa rekohé sushi. I mièntras sabínan ta diskutí ken ta mas sabí i ta traha moshonnan den reunionan públiko, ta bin ku amiendanan, ets. sushi no tapá ta sigui akumulá na Lagun, kandelanan bou di tera ta sigui brota, Morotin ta sigui krese na sushi.
Deskonfiansa públiko den nos mes ekspertonan ta hasi imposibel pa traha huntu na solushon. Tapamentu defisiente di asbèst ketu bai sin solushon, seru di tayernan ta sigui krese, no tin solushon pa diferente sushi ku ta yega Lagun, manera entre otro bateria, frigidèr, èrkondishon, glas, plèstic, ets. Bentamentu di sushi unda ku ta riba nos isla ta sigui i bira normal. I ku esaki e menasa pa ku salú di henter e pueblo, pero tambe e salú di nos medio-ambiente i naturalesa ta oumentá diariamente. Ainda nos lo por sostené e lema It’s in our nature pa loke ta un Boneiru limpi??…Fui nos ta probando mundo nèt lo kontrali.
Mirando e situashon aki, sindikalismo ta konvensí ku e seriedat i e sentimentu di urgensia no a penetrá sufisientemente serka esnan responsabel. En todo kaso nan akshonnan no ta demonstrá esaki. E problema na Selibon no ta uno di e trahadónan so, ela surpasá esaki.
E ta un problema di henter e isla. Banda di e trahadónan e konsekuensianan di un kiebro di Selibon lo toka tur kas di famia, tur kompania, en korto tur ku ta hasi uso di rekohementu di sushi i lo kousa un daño enorme na salubridat públiko, medio-ambiente naturalesa pero tambe na nos ekonomia. E siman aki tin un reunion di komishon fiho di R & O, dia 28 lo tin un reunion públiko pa trata presupuesto 2026 i indudablemente Selibon lo ta riba agènda di e dos reunionnan aki. Pa fin di luna e rapòrt di inspekshon di ILT lo ta konosí i representante interino di Reino lo reakshoná riba e rapòrt ku Entidat Públiko a entregá dia 13 último pa loke ta e medidanan ku nan a tuma for di aprel di e aña aki pa remediá e situashon na Lagun.
Sindikato lo no kier spekulá riba resultado di e reunionnan, pero por informá komunidat di Boneiru for di awor ku irrespekto e resultado di e reunionnan, sindikalismo a kuminsá prepará internamente pa por tuma akshonnan inmediatamente. Parti di e preparashonnan ta ku henter e komunidat lo ta envolví i no e 80 trahadónan di Selibon so. E por zona manera un menasa, pero pa nos e ta un atvertensia ku mester tuma hopi, pero hopi na serio. E kana a yena, antó no e kana di e trahadónan i sindikato so, sino e kana di henter e pueblo.
FUENTE: NÒCHI WILLEM/LIVE99FM
GIPHY App Key not set. Please check settings