PRESIDENTE DI BONAIRE HUMAN RIGHTS TA HASI APELASHON NA NASHONAN UNI PA DEFENDE MUHENAN I MUCHA MUHENAN DI PUEBLO BONERIANO

Kralendijk,- Na okashon di e trinta-sinku aniversario di e Deklarashon di Beijing i Plataforma di Akshon, Davika Bissessar Shaw, presidenta di Bonaire Human Rights Organization, a partisipá ku orguyo i presentá un deklarashon den e “Interactive Multi-Stakeholder Hearing”, ku a tuma lugá resientemente na e sede di e Nashonan Uni na New York.

E Deklarashon di Beijing i Plataforma di Akshon, ku a ser adopta den e Konferensia Mundial riba Asuntu di Hende Muhé na 1995 pa 189 pais, ta un kompromiso global fundamental pa igualdat di género i empoderashon di hende muhé i mucha muhé. E deklarashon aki ta duna direkshon strategiko riba 12 área esensial—inklusivo edukashon, salú, violensia, i partisipashon polítiko—i ta hasi yamada riba gobierno i sosiedad sivíl pa tuma akshon konkreto pa eliminá diskriminashon i garantisá igual oportunidadnan pa tur hende muhé i mucha muhé.

Davika Bissessar Shaw a presentá e siguiente deklarashon na nomber di pueblo di Boneiru, riba e realidadnan urgente ku mucha i hubentud ta enfrentá bou di kontinou kondishonnan kolonial, i a pone énfasis riba e Programa pa Derechonan Humano pa Hubentud i Mucha — un inisiativa dirigi I basa riba e komunidat ku ta enfoká riba dignidat, igualdat i partisipashon sivíl pa e generashon nobo.

Deklarashon di BHRO:

Boneiru ta un isla chikí den Karibe ku ta kontinua ta enfrenta desafionan severo bou di un sistema kolonial. Pero apesar di e obstakulonan aki, nos ta trahando duru pa konstrukshon di un futuro kaminda nos muchanan i hubentud por krese ku dignidat, igualdat, i konosementu di nan derechonan.

Nos Programa di Derechonan Humano pa Hubentud i Mucha ta dediká na edukashon i empoderashon. Kuminsando ku e añja eskolár ku ta bini i sigui te 2030, nos lo lansa un seri di inisiativa enfoká riba hubentud, trahando huntu ku komunidat pa medio di sosiedat sivil, organisashonnan, iglesia, i otro plataformanan lokal. E meta ta pa siña e generashon nobo prinsipionan fundamental di derechonan humano, igualdat i partisipashon sivíl. Nos ta kere firmemente ku edukashon ta e fundeshi pa kambio real I duradero.

Nos lo entrená tambe edukadónan pa propagá balornan di derechonan humano den henter komunidat. Esaki ta inkluí preparashon di edukadónan pa yuda stùdiantenan pensa kritikamente, komprondé hustisia i derecho i respeta diversidat—pa nan por bira lidernan ku ta eleva e komunidat.

Sinembargo, nos ta hasiendo esaki mientras ku nos ta enfrentanado desigualdatnan struktural profundo. Por ehempel, na e úniko skol segundario na nos isla, nos muchanan no ta permiti nan derecho pa haña les na nan idioma materno, Papiamentu. E sistema di edukashon, ku ta dominá pa Hulanda, no ta reflehá nos identidat òf nos konteksto kultural, i esaki ta miná desaroyo i derechonan di nos muchanan.

Pa motibu ey, nos ta sigui lanta nos bos internashonalmente—no solamente pa Boneiru, pero tambe pa komunidatnan kolonisa i marginalisa den Karibe. Komo miembro di Komishon di Reparashon di CARICOM i komo organisashon akreditá na e Nashonan Uni, nos ta forma aliansa I kolaborashon ku partnernan regional i internashonal pa promove hustisia, dekolonisashon, i empoderashon di hubentud.

Nos ta hasi un yamada na komunidat global pa rekonosé ku dekolonisashon i hustisia pa género ta profundamente konektá. Sin derecho pa autodeterminashon, derechonan di nos mucha—espesialmente mucha muhé—lo keda semper na peliger.

Bonaire Human Rights Organization ta komprometé pa tuma pasonan balente pa siña, empodera i protehá e hubentud—pero nos no por logra esaki nos so. Nos ta hasi yamada pa solidaridat global pa garantisá ku ningun mucha i ningun komunidat no wordu laga atras.

FUENTE: BONAIRE HUMAN RIGHTS ORGANIZATION