PREOKUPASHON KU DESAROYONAN RESIEN RONDÓ DI IDIOMA PAPIAMENTU DEN ENSEÑANSA NA BONEIRU

Kralendijk,- grupo di trabou posishon papiamentu a manda e siguiente rekomendashonnan pa ministerionan di ocw i bzk i e komiténan di tweede kamer relevante na hulanda oropeo:

• eliminá diskrepansia den lei i inkorporá papiamentu den legislashon i regulashon na un manera ku ta hasi hustisia na posishon di papiamentu komo idioma materno di mayoria di e alumnonan i komo e idioma di komunidat ku ta esun di mas grandi;
• ofisialisá nivel F2 di Kuadro di Referensia Papiamentu komo nivel sosial general, konforme e ambishon den Akuerdo Intergubernamental i sigurá ku esaki ta keda mantené;
• kana un trayekto propio pa Boneiru den aktualisashon di e términonan final i programanan di èksamen pa enseñansa sekundario;
• sigurá ku e aktualisashon akí ta kuadra ku posishon di papiamentu i hulandes den komunidat boneriano;
• tene kuenta ku posishon di papiamentu i hulandes den komunidat boneriano tambe ora ta determiná peso di e pruebanan pa traspaso papiamentu i hulandes pa e referensia na enseñansa sekundario;
• sigurá ku institushonnan di enseñansa ku gobièrnu ta finansiá, ta sigui e lei i regulashon pa papiamentu;
• sigurá ku Inspekshon (Hulandes) ta ehersé su funshon di kontrol tambe riba materia papiamentu;
• tuma medidanan apropiá pa oumentá e kantidat di ora di lès pa papiamentu, prinsipalmente den enseñansa primario;
• pone medionan disponibel pa desaroyo i/òf aktualisashon di métodonan i material di lès pa papiamentu;
• pone medionan disponibel pa formashon kontinuo na Boneiru di maestro di papiamentu i pa profeshonalisashon di maestronan aktual di papiamentu.

Bo tabata sa tambe ku …

1.  Kolegio Ehekutivo di Entidat Públiko Boneiru a dirigí un karta na e Komité  

 Permanente di Tweede Kamer pa Edukashon, Kultura i Siensia:

• ekspresando su gratitut pa e karta di e grupo di trabou pa protekshon di papiamentu;
• pidiendo protekshon struktural i promoshon di papiamentu na Boneiru.

(Fuente di e notisia akí ta karta ku Grupo di Trabou Posishon Papiamentu a manda pa Ministerionan di OCW i BZK i e komiténan di Tweede Kamer relevante na Hulanda Oropeo, ku kopia pa diferente instituto i órgano relevante)

FUENTE: SEDNEY MARTEN, MIEMBRO DI GRUPO DI TRABOU POSISHON PAPIAMENTU