HOPI TA E REAKSHONNAN RIBA E PUBLIKASHON DI SIMAN PASA RELASHONÁ KU ABUSO I EKSPLOTASHON DI TRAHADÓNAN IMIGRANTE RIBA NOS ISLA.

Kralendijk,- Sindikalismo kier kaba ku e situashonnan aki. Pa logra esaki nos mester risibí informashonnan verídiko di esnan ku ta pasando den e situashon aki.

P’esei nos kier hasi un yamada riba tur imigrante, pero tambe riba nos kompañeronan lokal i tambe otro fuentenan manera prensa i otronan ku tin informashon tokante e situashonnan aki pa tuma kontakto pa asina nos por traha un sita i por dokumentá e kehonan.

Nos ta garantisá ku nos lo reuní ku e outoridatnan konserní pa traha un plan kon ta bai atendé ku e dunadónan di mala fe, abusador i eksplotadónan aki ku ta violá nos leinan laboral pero tambe ta violá derechonan humano fundamental. Komo komunidat nos no por akseptá e situashonnan aki. Ta nos huntu mester pará pa nos estado di derecho demokrátiko i nos mester pone preshon riba e outoridatnan pa nan aktua konforme nos leinan. Ban huntu, ban para abuso awor. Por app na 7961165 òf via mail na norwinwillem@gmail.com.

Sindikalismo a tuma nota di dos karta

di urgensia ku a bai tantu pa gobièrnu di Boneiru komo pa Konseho Insular. Ta trata di dos karta di dos sektor ku ta importante pa nos ekonomia pues importante pa loke ta trata kuponan di trabou den nos komunidat. Nos ta referí aki na e karta di BONHATA, ku ta representá un 50% di nos forsa laboral ku alrededor di 7 mil trahadó i e karta di parti di Vereniging Bouwend Bonaire ku ta e sektor di konstrukshon, ku segun nan karta ta representá 1200 trahadó.

Tur dos organisashon ta pidiendo ku urgensia un reunion pa atendé dos punto di suma importansia pa nos ekonomia. Sindikalismo kier kuminsá pa awor ekspresá su preokupashon pa e situashon, pero mas tantu e preokupashon ta pa e aktitut indiferente ku sektor polítiko, esta gobièrnu i konseho insular ta tumando. Na un banda Konseho Insular ku ta esun ku demokrátikamente a keda eskohé pa representá nos komunidat, di kual 8 mil dosshen trahadó den e dos sektronan ku ta votadó riba kua ta kologá un menasa serio di pèrdè nan trabou. 

Otro un banda gobièrnu di Boneiru ku tin ku invertí nos fondonan generá di belasten den nos ekonomia pa krea trabou i krea konfiansa serka e invershonista di kapital ku nos ekonomia ta brinda perspektiva di ku su invershon lo duné un rendientu positivo tambe mester ta mas diligente. Sindikalismo kier urgi gobièrnu i konseho insular pa asumí nan responsabilidat den esaki i manera na tur momento sindikalismo a demonstrá esaki, nos ta dispuesto pa aportá na yuda yega na solushonnan. Tin un plataforma pa esaki, pues hasi uso di e plataforma aki. Sindikalismo den e dianan benidero lo bai sigui vigilá i monitoriá e desaroyonan aki di aserka.

Ta nos deber di protehá ku kuponan di trabou no ta bai pèrdí pa motibu di mal maneho òf ningun maneho ètòl.

Sindikalismo ta satisfecho ku e direkshon positivo ku e kompania Selibon ta kanando aden pa loke ta e aspekto atministrativo, esta kuentanan anual ets, pero nos ta sumamente preokupá ku e sirkumstansianan den Selibon i esaki for di 2019 ku nos a drenta den representashon di e trahadónan den Selibon. Nos ta referí aki na ekipo i material ku ta defisiente, no t’ei i si téi ta forma peliger pa e trahadó su seguridat i salú. Trahadónan ketu bai mester traha riba trùknan ku na nos pareser no mag di ta riba kaya mes mas pa rekohé sushi di kas i di kompania, na lèntfel no tin ekipo pa atendé den un forma adekuá ku prosesamentu di sushi, no tin ekpio pa kumpli ku e servisio públiko di tene Boneiru limpi, transporte pa hiba e trahadónan na nan boka di trabou no ta adekuá òf no tin mes. Sindikalismo ta desaprobá e  forma ku ta trata e trahadónan di Selibon, Nos a lucha duru pa por fin por a mehorá nan kondishonnan laboral despues di años ku a trata na un manera no digno komo ser humano.

Sindikalismo ta ekisgí awor ku gerensia, hunta di komisario, bonaire holding maatschappij i gobiernu ta sinta huntu i sindikalismo kier ta parti na mesa pa stòp di papia bunita, rekonosé tur loke ta robes i ban pone nos skouder bou di Selibon pa hasié un kompania boneriano di kual nos por ta orguyoso di dje. No neglishá manera a hasi esaki pa años e importansia di Selibon i mas bien e importansia di e trahadónan pa limpiesa di nos isla.

Nan kontribushon na salú públiko, na forsa di propaganda turístiko ta inpagabel. Lo minimo ku nan meresé ta sirkumstansianan laboral na drechi, esta ekipo i material pa nan por traha tur dia den un ambiente sigur i saludabel i agradabel. No laga ku ta ku akshon laboral atrobe mester logra resultado ku mester ta parti integral di un maneho saludabel. Kòrda ku a atvertí, aktua awor i no sigui birá ront di e barí di sushi.

FUENTE:NÒCHI WILLEM/LIVE99FM