UN PREGUNTA I/O REMARKE KU BO TA TENDE HOPI BIAHA TA KU SI SINDIKALISMO MESTER METE KU POLÍTIKA SI ÒF NÒ.

Kralendijk,- Mi kier duna mi opinion riba esaki pa e sirbi komo kuminda pa pensamentu den nos komunidat.

Na promé lugá nos mester realisá ku polítika no ta nada otro ku nos komo pueblo ta duna un grupo di hende e konfiansa, e sosten i e apoyo pa atministrá nos propiedatnan (tereno, edifisio, rikesanan tantu bou di tera, den laman i bou di fondo di laman i den aire) i nos fondonan ku nos ta produsí.

E konfiansa, sosten i apoyo aki nos ta duné atraves di un sistema demokrátiko kada 4 aña pa medio di votonan sekreto den un elekshon.

E konfiansa, sosten i apoyo ku nos ta duna aki, no ta duna e grupo poder apsoluto riba nos, sino e mester atené su mes na lei-i reglanan di bon gobernashon, pero alabes nos tin un sistema di kontrolá e grupo na tur momento ku e ta hasi su trabou den un forma korekto, transparente, husto, ku trato igual pa un i tur, ku e koutela nesesario pa no hasi daño na e komunidat, ets. ets.

E kòntròl aki, banda di esun institushonalisá den órganonan ofishal manera Konseho Insular, Kontrolaria General, Kolegio di Supervishon Finansiero (CFT) gezaghèber, representante di reino, defensor di pueblo, ministerionan, komunidat tambe tin su fuentenan di kòntròl ankrá den nos leinan.

Esun di mas importante ta ankrá den e libertatnan ku nos tin ku ta rekonosé internashonalmente komo derechonan fundamental humano i ku ta pará riba tur leinan.

E libertatnan fundamental di e ser humano ta stipulá den e Deklarashon Universal di Derechonan Humano i den tratadonan internashonal. E derechonan aki ta intokabel i ta aplikabel pa kada hende, sin importá su desendensia, religion o status sosial.

Pa e diskushon aki e siguiente dosnan ta sumamente importante pasobra nan dos lo sostené en prinsipio mi ponensia ku sindikalismo tin tur derecho di mete ku politika di komunidat. Nan ta artíkulo 19, ku ta regla ku kada un di nos tin derecho di tin su propio opinion i por ekspresá esaki tambe den tur libertat i artìkulo 20 ku ta bisa ku kada ken tin e derecho di ta afiliá na un sindikato o kualkier otro organisashon.

No mester lubidá ku sindikalismo ta representá e klase trahadó i su famia kual ta forma e gran mayoria di nos sosiedat i ku politika ta dependé totalmente di e mayoria aki i no robes pa drechi. Polítika mester ehersé ku e konfiansa, sosten i apoyo ku e mayoria di pueblo ta duné, pa resolvé problemanan, atendé ku nesesidatnan ku ta biba den pueblo i hiba un gobernashon husto. No ta por nada e lema si bo no ta goberná pa sirbi, bo no ta sirbi pa goberná.

Antó ku e dos derechonan aki sindikalismo ta mete ku polítika di pais pa duna su opinion i su aporte pa nos tin un komunidat husto, ku ta repartí e rikesanan bou di e poblashon na un manera husto pa asina tur hende tin un kalidat di bida desente.

Sindikalismo ta influenshá politika di pais pa perkurá ku tin leinan laboral ku ta garantisá trabou digno pa tur hende, pero tambe ku ta garantisá kondishonnan laboral i sirkumstansianan laboral sigur i saludabel pa e trahadó por funshoná. Sindikalismo ta esun ku ta lucha kontra pobresa i ta konsiderá pobresa komo un krimen kontra humanidat.

Sindikalismo ta influenshá gobièrno, esta polítika pa bin ku leinan ku ta protehá e trahadó kontra abuso i eksplotashon na boka di trabou. Sindikalismo ta esun ku ta lucha pa bin ku lei- i reglanan pa garantisá igual pago pa igual trabou.

Sindikalismo no mester mete ku politika partidista, pero ta un echo si ku hopi partido polítiko rònt mundo ta buska den sindikalismo sosten di voto pa nan metanan polítiko.

P’esei e konklushon di e komunikado aki no por ta otro ku SI, sindikalismo tin tur derecho legítimo pa mete ku polítika di pais. Sindikalismo ta perkurá pa tin balansa sosial den nos komunidat. Sindikalismo ta e balansa kontra e  forsa di kapitalismo ku si sindikalismo lo no t´ei dos fuente di rikesa ta kore riesgo di ser destruí i esei ta e forsa humano i nos naturalesa. Pa tal rason tambe no ta por nada ku e meta di Dialogo Sentral kaminda tin sintá politika, empresa i klase trahadó, ta a base di konsenso entre e tres partidonan menshoná kontribuí riba base igual na un Boneiru sosialmente, ekonómikamente i ekológikamente duradero.

Esaki respetando kada partido su responsabilidat ku e tin. No kada un ta ranka aki ranka aya sino huntu pa un mihó Boneiru.

FUENTE: NÒCHI WILLEM/LIVE99FM