UN BIAHA MAS: BONERIANO KU IMIGRANTE PAGA BON TINU !!

Kralendijk,- E ta importante pa ripití nos atvertensia: NO sali bai afó ku mas di $ 10,000.- na cash riba bo persona! Si bo ta bai ku mas ku $ 10,000.- na plaka efektivo, bo por haña bo den hopi problema. Gobièrnu di Hulanda a pasa un lei pa Boneiru (es desir pa ‘BES’) ku ta prohibí un y tur pa biaha bai afó ku mas ku $ 10,000.- na cash.

Si bo tin bon motibu pa bai ku mas ku $ 10,000.- na cash, bo tin ku mèldu esaki delantá na duana. Anto e ora ei, bo por haña pèrmit. Pero bo mester mèldu delantá. Y splika ta dikon bo ta bai afó ku asina tantu plaka. Y kon bo a haña e plaka.

Pues no riska hasta kastigu di prizòn of algun dia di detenshon plùs un but haltu (komo $ 5,000.).  Esaki no ta wega.

Meta di e lei aki ta pa prevení ku hende ta bai ‘laba plaka’, òf pió, ta bai finansiá terorismo. E lei konserní yama: ‘Lei pa Prevení Labamentu di Plaka y Finansiamentu di Terorismo BES’ (Wet ter voorkoming van witwassen en financieren van terrorisme BES). Chèk e lei na internèt y lesa art. 4.2 ku 6.1 ku atenshon.

Nos tin ku bisa ku e lei aki tin un base totalmente robes. Lei penal t’ei pa evitá ku siudadanonan ta tuma lei den nan mes man. Y pa kastigá krímen. Anto si un siudadano no ta tene su mes na lei penal, fiskal ku polis lo investigá. Y si tin prueba, Korte lo kastigá esun ku a kometé e krímen.

Pero kiko ta un krímen? E ta un akto ku nos tur (esta gran mayoria di hende) ta konsiderá imoral of kriminal. P.e. ladronisa, robo, asesinato, maltrato, atrako, froude etc. E tipo di aktonan aki mundialmente ta wòrdu konsiderá di ta imoral y kriminal. Y na tur parti di mundu bo ta haña kastigu si bo kometé e tipo di aktonan aki. Nos tur por ta di akuerdo ku esei.

Pero den e lei nobo aki nos ta mira ku gobièrnu a pone kastigu di prizòn y butnan haltu kontra algu ku riba su mes NO ta ni imoral, ni kriminal. Dikon biaha ku mas ku $ 10,000.- na cash ta kriminal? Si mi kier kana ku mas ku $ 10,000.- di mi propio sèn riba kaya, ta mi derecho. E no ta prudente, pasobra un kriminal por atraká mi. Pero ta mi pleno derecho pa hasi’é. Si mi kier biaha bai afó ku mas ku $ 10,000.- di mi propio sèn den mi saku, tambe ta mi pleno derecho.

Pues aki gobièrnu ta hasi un krimen di algu ku riba su mes no ta kriniminal. Ni imoral. E lei aki ta limitá e libertat di hende sin tin nodi. Y sin kousa hustu. Anto si bo ta bisa ku tantu sèn na cash riba bo persona ta sospechoso, bo tin un punto. Pero sospecho no ta prueba. Den un demokrasia mester tin prueba kontra un hende promé ku por kastig’é. No sospecho so. Den un demokrasia, nos ta presumí e buena fe di hende. Mala fe mester wòrdu pruebá. E solo hecho ku un hende tin mas ku $ 10,000.- riba su persona no ta prueba ku el a kometé un krímen.

Pues e lei nobo aki ta kita nos libertat y ta kastigá algu ku riba so mes no ta kriminal. Anto nos a papia ku un hende ku a kai den e trampa aki. Y en bèrdat e tabatin e sèn riba su persona pa motibunan totalmente legal y korekto. Tòg el a pasa algun dia den detenshon.

Pues nos konseho na tur hende ta keda: NO biaha ku mas ku $ 10,000.- na cash riba bo persona. Pasobra lei ta prohibi’é. Si bo mester biaha ku mas ku $ 10,000.- pa un of otro motibu, tuma kontakto ku duana delantá. E ora ei, bo por haña pèrmit. Pero si un hende a haña su mes den e problema aki y e tin ku bai dilanti Korte, fundashon Golden Meand Society ta dispuesto pa supsidiá bo kaso pa un abogado defendé bo a base di argumentashon di prinsipio.

Si un akto prohibí pa lei ta totalmente moral y korekto, Korte por disidí di NO duna bo niun kastigu, ni but. Y hasta bo por haña kompensashon pa e dianan di detenshon ku bo a pasa kaba.

Kualkier Boneriano of imigrante ku ta deseá di haña mas informashon presiso over di esaki of otro problema hurídiko, por tuma kontakto ku Direktiva di FUIB (yama: 787 2373) of por pasa libremente na nos Konsultorio hurídiko grátis tur djasabra di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A. Telefòn y whatsapp: 796 2650.

 FUENTE: FUIB ABOG. M. BIJKERK