SPAB ORGUYOSO DI SU TALENTONAN.

 KRALENDIJK – SPAB, School of Performance Arts Bonaire ta sumamente orguyoso di su talentonan. Djasabra 21 i djadumingu 22 di yüni, e skol a tene presentashonnan ku su alumnonan i esakinan tabata un éksito rotundo.

Por a mira presentashon na tur nivel, di prinsipiante i di esnan avansá, di alumno i di dosente, i tambe di un grupo folklóriko ku ta haña lès serka Luis Moka na e skol. 150 mucha, di 3 te ku 18 aña, a partisipá. Nan tur a impreshoná. 

SPAB: “Nos ta asina orguyoso di nos bailarinanan i artistanan talentoso ku a duna tur loke nan tin den tur presentashon. Na nos dosentenan dediká, danki pa boso guia, pashon i sosten inkansabel. Huntu nos a krea algu inolvidabel.”

SPAB ta gradisí tambe tur hende ku a presensiá e shounan i a sostené e skol. “Boso presensia a hasi esakinan realmente spesial.

Nos ta enormemente gradesido tambe ku nos tremendo boluntarionan. Sin boso, e evento akí lo no por tabata posibel.”

Un gradisimentu spesial di SPAB ta bai pa su spònsernan generoso ku ta Buddy Dive Resort, Voz Di Boneiru, Bonaire Logistics, Innatus BV, Tempo Bonaire, Rica, Cultuurfonds Caribisch Nederland, DKN (Design by Neka), Rambouw BV, Technobar, Black Ice, LF & MM Construction BV i Pauwnee Construction EZ.

FUENTE: SPAB/LIVE99FM