NEGLIGENSIA DI SELIBON LAGUN TA MINIATURA DI LOKE TA PASA DEN SU TOTALIDAT NA BONAIRE.

Kralendijk,- Awor ku Selibon Lagun ta kai bou di maneho di Representante interino di Reino nos ta mira e negligensia di tantu Konseho Insular komo Kolegio Ehekutivo.

Na lugá ku ta responsabilisá e gobernashon di Bonaire ta tira falta riba otro i no ta aseptá ku ta nan mester a drecha e situashon. Aki nos ta yega na e parti di polítika na Bonaire ku a sali totalmente for di man i manera un analista a splika ku por kategorisá funshonamentu di Konseho Insular i Kolegio Ehekutivo komo “Knoeiwerk” ku ta nifiká mòrsmentu.

Laga nos konstatá ku Kolegio Ehekutivo a kita mandato di Direktornan i hinka tur kos den man di sekretario di teritorio insular, a hisa rekompensa di konsehalnan, biahamentu sin miserikòrdia, a traha riba proyekto di WolBes i Finbes, ku gabinete a posponé, sekretario di Estado Van Huffelen a reuní den bodega ku e konsehalnan riba asuntu di kompensashon, kandela na Selibon Lagun a kondusí na intervenshon di Representante interino di Reino, plan di impuesto a bira un problema, otorgamentu di tereno a bira un privilegio, direktor di TCB a bai i no tin klaridat ken ta bira direktor nobo, laga  ta un boneriano i no un konsultent no boneriano tuma rienda, den sekresia ta regla ken ta bai manehá Kas di Bonaire na Hulanda, ta mete ku Piskabon, ta mete ku Pasado di sklabitut, ta mete ku funshonamentu di Representante interino di Reino ta humiá esnan ménos prudente pa para den rei manera tempu di katibu pa haña “ransun”.

Komunikashon ku pueblo ta sumamente malu i tantu konsehal, gezaghèber komo diputadonan sa pero no ta hasi nada loke tambe ta negligensia di tarea i mas peligroso ta desintegrá sosiedat. Polítika ta pa trese den práktika balornan manera, derecho igual, derecho humano, responsabilisashon na pueblo, protehé interes di pueblo i no apliká arbitrariedat.

Ta e momentu pa bisa ta basta i tuma akshon den propio man i no laga konsehal, diputado i ámtenarnan ku ta dependé di gobièrnu bisa i imponé riba abo pa nan sigui ku mòrsmentu. Tarea di gobièrnu ta pa Fasilitá i no dikta.

  FUENTE: ARTHUR EWART SEALY/LIVE99FM