FITTIPALDI PIETERSZ TA YAMA DANKI

KRALENDIJK—Fittipaldi Pietersz ta yama danki na Byron Tromp i Fary Domacasse, esnan ku a prepará loke el a skirbi, pa presentá djasabra 31 di ougùstùs.

E kantika a sali na di tres lugá den Kanta Bo Boneiru 2024. Fittipaldi: “Mi ta masha kontentu ku e kantika ku mi a skirbi i Byron tabata e kompositor di melodia i a ahustá kaminda tabata nesesario, e letranan, pa Fary kanta. Di 3 lugá ta bon, sigur mi tabatin den menta pa mihó posishon. Mi ta kere tur kantadó òf skirbidó i areglista ta deseá lo mehor pa nan kantika. Mi ta kontentu ku e trofeo, pasobra nos no a bai kas man bashí. Ta 2 kantika ku mi a skirbi i poko poko mi ta gara eksperensia. Hopi danki na Byron, ku a kere den loke mi a skirbi i tabata dispuesto pa yuda. Tremendo trabou ku dedikashon. Meskos ta e kaso e músikonan, enkabesá pa Almar Nicolaas i Faysel Francisco. Durante seshonnan di treinen, por mira ku nan ta hinka hopi esfuerso pa kada kantante. Kualke kos ku no ta zona na smak, un bes ta koregí, pa kada kantika ta na agrado di e kantante i su tim. Danki na nan i tambe Ruvienne Rodriguez, ku a karga e aktividat kanta Bo Boneiru 2024, pa e tabata bon e anochi di presentashon. Un apresio pa Fary, den ménos ku 2 siman, a logra konosé e kantika i dominá e melodia. Nada fásil, pero el a logr’e i a bai tur ku tin. Kanta Bo Boneiru ta riba e bon kaminda atrobe, sigur mirando e públiko ku ta kresiendo kada aña. Trabou serio ta paga. Pabien na tur kantante ku a partisipá. Boso kada un a hasi tur esfuerso i e final, ta hurado ta disidí e posishon di kada kantante. Ban pa 2025 bira mas grandi.”

FUENTE:FITTIPALDI/LIVE99FM