BONAIRE TA LAGA TENDE SU BOS NA E TERSER KONFERENSIA REGIONAL DI CARICOM TOKANTE REPARASHON NA BARBADOS 

Kralendijk,- E Líder di Partido Pueblo Progresivo (PPP), Sr. James Finies, lo laga tende e bos di Boneiru na e región Karibense durante e históriko terser Konferensia Regional di CARICOM tokante Reparashon na Barbados.Sr. Finies ta akompañá pa Sra. Davika Bissessar Shaw, Presidente di Bonaire Human Rights Organization (BHRO), kual ta Miembro Asosiá di e Komishon di Reparashon di CARICOM.

E konferensia di kuater dia ta reuní lídernan prominente di Karibe i di mundu, akademikonan i defensornan di reparashon, inkluí Profesor Verene Shepherd, Sir Hilary Beckles, Promé Minister Mia Mottley i eks-Promé Minister Ralph Gonsalves I otronan.

E promé konferensia regional a tuma lugá na St. Vincent i Grenadines na sèptèmber 2013, sigui pa e di dos na Antigua i Barbuda na sèptèmber 2014. Awor Barbados ta anfitrion di e di tres konferensia, di 17 te ku 19 di sèptèmber, kontinuando ku e esfuersonan di e región Karibense pa avansá e kaso internashonal pa hustisia reparativo.

E kontribushon di Boneiru, hasí pa Sr. Finies i Sra. Bissessar Shaw na e CARICOM 10-Point Plan pa Reparatory Justice, ta forma parti di e trabou ku lo wordu relansá durante e konferensia. Nan a soru pa pone kolonialismo, ku a keda eksistí, klaramente dentro di e marko di reparashon, enfatisando ku pa teritorionan manera Boneiru, hustisia reparativo no por wòrdu separá di e proseso ainda no terminá di deskolonisashon.

Durante e konferensia, Sr. Finies lo duna un diskurso tokante e historia di Boneiru i e eksperensianan di su pueblo di desendensia Afrikano, inkluyendo Afrikanonan esklavisá ku tabata víktima di e tráfikashon transatlantiko di pesonanan esklavisá ku resientemente Nashonan Uni a deklara komo e krimen di mas grave di historia di mundo.

Finies su intervenshon lo resaltá tambe e importansia históriko di Boneiru pa e ekonomia kolonial Hulandes, partikularmente pa medio di su industria di salu. E salu di Boneiru tabata un produkto di hopi balor ku e Hulandesnan tabata usa, entre otro, pa konservá haring, e tempu ey historikamente tabata konsiderá komo “oro blanku”.

Tras di e rikesa ekonómiko aki tabata e trabòu forsá i e sufrimentu di nos ansestornan Afrikanonan esklavisá ku tabata traha bòu di kondishonnan duru i inhumano den e saliñanan di Boneiru, tambe konosí komo “e fierno blanku”. Nan trabòu a kontribuí na e ekonomia kolonial, miéntras nan tabata deprivá di nan libertat, dignidat i kontrol riba nan mes bida.

BHRO i PPP ta kere ku e historia aki mester forma parti di e diskushon mas amplio Karibense i internashonal tokante hustisia reparativo.

E partisipashon di Boneiru na e konferensia di reparashon na Barbados konsekuentemente ta kombiná dos asunto ku tin un konekshon estrecho ku otro: reparashon pa e inhustisianan históriko infligí na personanan di desendensia Afrikano, i derechonan di e pueblo di Boneiru.

FUENTE: JAMES FINIES