BONKARATE TA BRIYA NA CHILE KU DOS MEDAYA DI BRÒNS PANAMERIKANO I SUDAMERIKANO

Kralendijk,- BonKarate ta bolbe pone nòmber di nos isla na haltu despues di un bon prestashon  durante e kampionato internashonal di karate i kickboxing ku a tuma lugá na Olmué, Chile. E atletanan Everon Vrutaal i Jeronimo Lont a sa di sobresalí i a logra medaya di bròns pa Bonaire.

E delegashon, liderá pa Sensei Peter Silberie, a sali for di Bonaire riba djamars 11 di ougùstùs rumbo pa Chile. Riba djarason 12 di ougùstùs a tuma lugá e inskripshon ofisial i pisamentu di e atletanan, siguí pa e reunion general di WAKO (World Association of Kickboxing Organizations) kaminda Sensei Silberie a representá nos isla.

E kombatenan di alto nivel a kuminsá ofisialmente riba djaweps 13 di ougùstùs. E atletanan di BonKarate a demostrá gran disiplina, determinashon i kalidat den kombate nan

Everon Vrutaal a logra e di tres lugá (medaya di bròns) den e Kampionato Panamerikano senior.

Jeronimo Lont a logra e di tres lugá (medaya di bròns) den e Kampionato Sudamerikano.

E torneo a yega na su kúlminashon djasabra 15 di ougùstùs ku e gran finalnan, siguí pa e seremonia di klousura i entrega di premio.

BonKarate ta felisitá e atletanan i Sensei Peter Silberie pa e resultado aki

FUENTE: BONKARATE/LIVE99FM