DOS DETENSHON I ARMA DI KANDELA KONFISKÁ .

Notisia di polis di djabièrnè 31 di yüli te ku djaluna 3 di ougùstùs 2026

Ladronisia di pikòp

Djaluna 3 di ougùstùs a drenta keho di ladronisia di un vehíkulo ku tabata stashoná riba Kaminda Sorobon na altura di un establesimentu di hóreka. Ta trata di un pikòp koló shinishi di e marka Toyota, tipo Hilux, ku plachi di number V-179. Ta investigando e kaso.

Outo ta dal den palu di lus

Djadumingu 2 di ougùstùs, alrededor di 9.15 or di anochi, ‘meldkamer’ sentral a risibí notifikashon tokante un aksidente na Kaya Sirena. Na yegada di polis a resultá ku un outo ku tres okupante, di kua un beibi, pa motibu ainda deskonosí a dal den un palu di lus. E vehíkulo tabatin daño material konsiderabel. Personal di ambulans a presentá na e sitio i a transportá e beibi ku a resultá heridá, pa hòspital pa tratamentu médiko. Konforme e maneho di ‘botsen is blazen’ a hasi tèst di supla ku e shofùr pero no tabatin indikashon tokante uso di alkohòl. A resultá ku e shofùr ta menor di edat. E lo haña but pa no por mustra un reibeweis, pa transportá un beibi sin un stul spesial pa mucha i pa manehá sin faha di seguridat bistí.  

UPDATE: Entrada hudisial i detenshon na Kaya Maria

Den oranan lat di anochi di djamars 28 di yüli a tene entrada hudisial na un kas situá na Kaya Maria. Aki a detené un hòmber di inisial F.C.M. di 18 aña di edat i a konfiská artíkulonan relevante pa e kaso. KPCN por konfirmá ku entre lokenan ku a konfiská ta trata di un arma di kandela, supstansianan narkótiko i dos vehíkulo. Investigashon ta kontinuá.

Detenshonnan pa manehá bou di influensia di alkohòl

Durante e fin di siman ku a pasa, polis a detené kuater(4) shofùr pa manehá bou di influensia di alkohòl.

Djadumingu 2 di ougùstùs, alrededor di 9.10 or di anochi, a detené e hòmber di inisial R.R.G. di 42 aña di edat na Kaya Grandi. E sospechoso a kore dal ku su ‘buggy’ tras di un outo. Dokumentu di e shofùrnan tabata na òrdu. Konforme e maneho di ‘botsen is blazen’ a hasi un tèst di supla ku ámbos shofùr. Aki tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i el a haña prohibishon di manehá pa 2 ora.

Djadumingu 2 di ougùstùs, alrededor di 4.10 or di mardugá, a detené e hòmber di inisial E.D.P.H. di 26 aña di edat riba Kaya Nikiboko Sùit. E sospechoso tabata enbolbí den un aksidente entre dos vehíkulo. Konforme e maneho di ‘botsen is blazen’, a hasi un tèst di supla ku ámbos shofùr. Aki tabatin indikashon ku e sospechoso a konsumí mas alkohòl ku ta pèrmití pa lei. i a hib’é warda di polis pa un análisis di rosea i a konfiská su reibeweis.

Djasabra 1 di ougùstùs, alrededor di 3.25 or di mardugá, a detené un hòmber di inisial J.B. di 26 aña di edat riba Kaya Grandi. Un patruya a para e sospechoso pa kòntròl rutinario i a hasi un tèst di supla kuné. A resultá ku tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i el a haña prohibishon di manehá pa 5 ora.

Djasabra 1 di ougùstùs, alrededor di 2.20 or di mardugá, a detené un hòmber di inisial D.F.T.G. di 24 aña di edat riba Bulevar Julio A. Abraham. Un patruya a duna e shofùr señal pa para despues ku a mira un skuter ku tres persona riba dje. Un di e personanan no tabatin hèlm bistí i a haña but pa esaki. E shofùr tabata mustra diferente karakterístikanan di un persona ku ta bou di influensia di alkohòl i a hasi un tèst di supla kuné. A resultá ku tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i el a haña but pa manehá sin reibeweis bálido.

Ademas a traha un prosèsferbal pa tur sospechoso enbolbí. 

Bringamentu ta terminá den kaso di hinkamentu

Djadumingu 2 di ougùstùs, alrededor di 12 or di mardugá, ‘meldkamer’ sentral a risibí notifikashon tokante un kaso di hinkamentu na altura di un bar na Kaya Korona. Despues di investigashon a resultá ku algun ratu promé un bringamentu entre dos persona a tuma lugá despues di kua un persona deskonosí a hinka su víktima ku un arma blanku. Despues di e insidente, e sospechoso a bandoná e sitio. Ambulans a transportá e víktima pa hòspital pa tratamentu médiko. Ta investigando e kaso.

Dos detenshon i arma di kandela konfiská

Djasabra 1 di ougùstùs, alrededor 4.20 or di mardugá, a detené dos sospechoso pa violashon di Lei di Arma di Kandela BES. E detenshon a tuma lugá despues ku algun ratu promé a drenta notifikashon tokante un outo sospechoso ku tabata move den Nikiboko. Na yegada di polis, no a topa ku e vehíkulo en kuestion. Riba un tereno habrí na Kaya Chogogo, a topa ku un baiskel eléktriko (fatbike). Durante kòntròl mas aleu a resultá ku e fatbike ta registrá ku un keho komo hòrtá.

Mientras polis tabata na e sitio, a mira un outo ku tabata kuadra ku e deskripshon duná. A duna e shofùr señal pa para pa un kòntròl. A listra den e vehíkulo i a topa ku un arma di kandela. A detené ámbos okupante di e vehíkulo. Ta trata di e shofùr, un hòmber di inisial J.A.M. di 24 aña di edat i e pasahero, un hòmber di inisial J.C.L.M. di 36 aña di edat. A konfiská e arma di kandela, dos arma blanku, un bivakmùts, e outo i e fatbike pa mas investigashon.

Detenshon pa destrukshon i maltrato

Djabièrnè 31 di yüli, alrededor di 10.55 or di anochi, a detené un dama di inisial J.J.O. di 27 aña di edat na Kaya Elvira pa destrukshon i maltrato di un ámtenar den funshon. Detenshon di e sospechoso a tuma lugá despues ku djaweps 30 di yüli, el a drenta un establesimentu di hóreka den centrumgebied ku kara tapá i a destruí un vitrina. Despues el a bandoná e sitio. Durante su detenshon, e sospechoso a resistí fuertemente i a maltratá un agente polisial. Tambe a konfiská supstansianan probablemente narkótiko i otro artíkulo relevante pa e investigashon.

Kòntròl planiá di tráfiko

Den oranan trempan di anochi di djabièrnè 31 di yüli, Kuerpo Polisial Hulanda Karibense(KPCN) den koperashon ku Duana a tene un kòntròl planiá di tráfiko na Kaya Amsterdam i Kaya Neerlandia. Meta di e kòntròl tabata pa listra vehíkulonan riba transporte di artíkulonan prohibí. Durante e kòntròl aki a para i kontrolá dies(10) vehíkulo. A konfiská dos kuchú, un machete i un kantidat chikitu di supstansianan probablemente narkótiko.

Kòntròlnan di tráfiko ta kontinuá.

FUENTE: KPCN/LIVE99FM