UN OTRO DEROTA PA HULANDA NA NASHONNAN UNÍ: ECOSOC TA REAFIRMÁ APOYO PA TERITORIONAN SIN PROPIO GOBERNASHON 

Kralendijk,- James Finies i Davika Bissessar Shaw di Bonaire Human Rights Organization (BHRO) a asistí na e promé dia di e Management Segment di yüli 2026 di e United Nations Economic and Social Council (ECOSOC), tení dia 21 di yüli na Sede Prinsipal di Nashonnan Uní na New York. Durante e promé dia, e Konseho a tene su reunionnan plenario númerò 39 i 40.

Representando BHRO, e delegashon a partisipá komo parti di e trayekto Bonaire Lives Matter, den su kompromiso kontinuo ku e proseso nan di Nashonnan Uní relashoná ku e relisting di Bonaire, derechonan humano i desaroyo sostenibel.

E reunion tabata parti di ECOSOC, ku ta reuní henter e sistema di Nashonnan Uní, inkluyendo su agensianan spesialisá, komishonnan, fondo-nan, programa-nan, organismo di eksperto i institushonnan internashonal asosiá. Entre otro nan ta organisashonnan manera UNESCO, WHO, ILO, FAO, UNDP i UNICEF, ku nan asistensia tékniko i programanan di desaroyo ta forma algun di e benefisionan prinsipal disponibel pa Teritorionan Sin Propio Gobernashon den e sistema di Nashonnan Uní.

Durante e seshon, e Estadonan Miembro a adoptá ku 31 voto na fabor, un kontra i 17 abstenshon, e resolushon titulá “Support to Non-Self-Governing Territories by the Specialized Agencies and International Institutions Associated with the United Nations.”

Reino Hulandes tabata entre e paisnan ku a abstené. Esaki ta sigui e desishon ku Hulanda a tuma na mart 2026 ora e tambe a abstené riba e resolushon di Asamblea General, presentá pa Ghana, tokante reparation i rekonosementu di sklabitut komo e krimen mas grave kontra humanidat. E abstenshonnan konsekutivo di Hulanda aki, huntu ku e trabou di konsientisashon internashonal di BHRO, lo intensifiká e skrutinashon riba e posishon di Hulanda tokante esfuersonan internashonal pa atendé responsabilidatnan kolonial i promové e desaroyo di pueblonan ku ta biba bou di un status no autónomo.

BHRO a selebra I aplaudi e 31 voto na fabor, señjalando ku e adopshon di e resolushon ta reafirmá e responsabilidat kontinuo di e sistema di Nashonnan Uní, inkluyendo su agensianan spesialisá i institushonnan internashonal afiliá, pa sostené e desaroyo sosial, ekonómiko, edukativo i institushonal di e Teritorionan Sin Propio Gobernashon. Esaki ta mustra ku e sistema di Nashonnan Uní ta funshoná pa NSGT’s, i dikon James Finies ta mira relisting di Boneiru komo e solushon pa ku Boneiru por benefisiá di supervishon i sosten di Nashonnan Uní.

E abstenshon di Hulanda ta spesialmente signifikativo, pasobra na 2010 Boneiru a wòrdu inkorporá den e Konstitushon Hulandes sin konsentimiento di su pueblo, bou di atministrashon direkto for di Den Haag. Diferente di Aruba, Kòrsou i Sint Maarten, Boneiru no tin status di pais autónomo den Reino Hulandes. E leinan ku ta goberná Boneiru ta wòrdu impone pa Parlamento Hulandes, miéntras ku e pueblo di Boneiru ta sigui buskando un partisipashon real den e desishonnan tokante su futuro polítiko.

BHRO a ekspresá preokupashon ku e poblashon nativo Boneriano ta enfrentando marginalisashon polítiko, kultural i demográfiko, un krisis humanitario silensioso. Na 2004, Boneiru tabatin aproximadamente 10.000 habitante, ku mas ku 80 porshento ta nativo. Awe, e poblashon a pasa 25.000, miéntras ku e poblashon nativo a baha bou di 30 porshento i, segun proyèkshonnan, lo baha bou di 15 porshento dentro dies anja. E krísis humanitario eksistensial i menasa di eliminashon demográfiko i kultural ta eksigí kompromiso internashonal urgente.

Fundador di BHRO, James Finies, a reafirmá e kompromiso di e organisashon pa sigui traha huntu ku Estadonan Miembro na apoyo di e reinskripshon di Boneiru riba e Lista di Nashonnan Uní di Teritorionan Sin Propio Gobernashon, enfatisando ku supervishon internashonal renobá ta esensial pa garantisá ku e pueblo di Boneiru wòrdu protehá i inkluí kompletamente den tur desishonnan ku ta afektá nan futuro.

FUENTE: BONAIRE HUMAN RIGHTS ORGANIZATION